Пры размове з Юрыем яшчэ ўлетку хлопец расказаў, што да сёлетняй уборачнай дзевяць сезонаў працаваў камбайнерам, адзін сезон – памочнікам камбайнера.
– А вось цяпер адвожу збожжа ад камбайнаў Дзмітрыя Ханько і свайго бацькі – Аляксея Пятровіча, і адначасова з’яўляюся ў яго памочнікам, – гаварыў вадзіцель. – За дзень па маршруце поле – збожжаток, а ён размяшчаецца ва Узнацку, звычайна раблю 9-10 рэйсаў. За рулём у гэты гарачы час прыходзіцца быць гадзін па 16. Але для мяне ўвайшло ў звычку рана ўставаць і позна класціся спаць. У сельскай гаспадарцы я ўжо дзесяць гадоў. Пасля заканчэння школы крыху папрацаваў у Стараселлі, а затым паехаў вучыцца на механізатара ў Крупкі. Практыку праходзіў у роднай гаспадарцы, тут і застаўся. Праз пэўны час адвучыўся на вадзіцеля, вось цяпер мне падуладны грузавы аўтамабіль. Разумею, што лёс вырашчанага ўраджаю і ў маіх руках, таму не маю ніякага права падвесці іншых, стараюся, каб па маёй віне камбайны не прастойвалі ніводнай хвіліны.
Далей хлопец гаварыў аб тым, што прыкладам для яго быў і застаецца бацька. Аляксей Пятровіч – неаднаразовы пераможца працоўнага спаборніцтва ў сельгасарганізацыі, у мінулым годзе прымаў удзел у абласных «Дажынках». У гэтай жа гаспадарцы добрыя рэзультаты на розных работах паказваў і яго брат Генадзь, які затым з сям’ёй пераехаў у Слуцкі раён, дзе ўладкаваўся на работу механізатарам і там таксама знаходзіцца ў лідарах.
З Юрыем Пыжыкам давялося сустрэцца і на свяце «Дажынкі». На пытанне, у чым сакрэт поспеху, ён адказаў: «У таварыстве 5 машын. Мы, вадзіцелі на адвозцы збожжа ад камбайнаў, канечне ж, спаборнічалі паміж сабой. Сапернікаў было, як бачым, не многа, але ўсе дастойныя. Атрымалася, што я вырваўся ўперад і заняў першае месца ў гаспадарцы, і другое ў раёне – мне ўдалося перавезці 2 тысячы 248 тон збожжа».
Да ўсяго сказанага вышэй варта адзначыць, што сярод маладых вадзіцеляў і механізатараў на адвозцы збожжа ад камбайнаў па другой групе транспартных сродкаў Юрый Пыжык заняў першае месца, і на галоўным форуме сяльчан узнагароджаны Ганаровай граматай Крупскага раённага выканаўчага камітэта і грашовай прэміяй.