Вось і зноў па Божай міласці мы святкуем адно з самых любімых святаў – Божае Нараджэнне. Мы спяшаемся да касцёла, каб пакланіцца Немаўлятку Езусу, які знаходзіцца ў яслях, прымаем удзел ва ўрачыстай святочнай літургіі, а пад па-святочнаму ўпрыгожанай ёлкай знаходзім падарункі. Радуючыся ім і засяроджваючы ўвагу на матэрыяльных рэчах, мы павінны памятаць аб той любові, якой іншы чалавек такім чынам дзеліцца з намі. Божае Нараджэнне нагадвае нам аб тым, што Бог таксама адорвае нас Сваім падарункам, якім з’яўляецца ўцелаўлёны Божы Сын. Гэты Божы дар мы атрымліваем не ў прыгожай упакоўцы, але ў простых яслях. Там Бог пакінуў нам Свой калядны падарунак, перавязаны не залацістай стужкай, але любоўю да грэшнага чалавека, каб яго збавіць.
У Бэтлеемскіх яслях Бог паказаў сваю любоў як дар самога сябе. Божая любоў – гэта не сентыментальная любоў, а любоў, якая выяўляецца ў ахвяры сябе чалавецтву. Уцелаўленне Сына Божага – гэта першы крок такой любові, якая потым праявілася ў абвяшчэнні Божага слова, справах міласэрнасці, адпушчэнні грахоў і дасягнула свайго апагею ў пасхальнай таямніцы крыжовай смерці і ўваскрасення.
Падобна Хрысту, праз сведчанне іншым людзям любові, міласэрнасці і спагады нябеснага Айца мы пакліканы даваць надзею свету, што можам учыніць, наследуючы Яго прыклад самаадданай любові ў служэнні бліжнім.
Са святам, дарагія браты і сёстры! Віншую каталікоў і іншых хрысціянаў, якія разам з намі святкуюць свята Раства Хрыстова. Віншую праваслаўных і жадаю ім поспехаў у духоўнай падрыхтоўцы да Божага Нараджэння! Нягледзячы на розніцу традыцый, мы аб’яднаныя адной праўдай аб уцелаўленні Сына Божага, як самага каштоўнага дару чалавецтву, і імкненнем да яго сведчання ў сучасным свеце, каб вылечыць яго ад існуючых духоўных паталогій.
Віншую ўсіх людзей добрай волі! Езус – адзіны Збаўца свету, і таму наша свята супольнае. Няхай наша Бацькаўшчына стане яслямі, дзе заўсёды нараджаецца Хрыстус, каб Ён Сваёй ласкай быў дарам кожнаму з нас. Беларусь, не бойся адчыніць дзверы прыходзячаму Збаўцу, не бойся прыняць Хрыста, не бойся жыць Ягонай праўдай, бо ў Ім наша збаўленне, наша радасць, шчасце і надзея!
Урачыстая літургія:
24.12.18 – 22.00 (святочная Вігілія)
25.12.18 – 10.00.
Ксёндз Віталій СТРЫГА, пробашч касцёла імя святога Юзафа ў Крупках.