У год 70-годдзя Вялікай Перамогі ў раёне праходзіць рэспубліканская грамадска-культурная акцыя пад назвай «Мы беларусы – мірныя людзі». Згодна з графікам, складзеным аддзелам ідэалагічнай работы, культуры і па справах моладзі райвыканкама, творчыя калектывы Дамоў культуры і сельскіх клубаў выступяць з канцэртамі ў аддаленых і маланаселеных вёсках Крупшчыны.На бягучым тыдні ноткі задорнага настрою вяскоўцам з Дакучыно і Вялікага Камянца дарыў дружны музычны калектыў Крупскага раённага Цэнтра культуры.
– Усё далей у гісторыю адыходзяць вогненныя гады Вялікай Айчыннай. Але ніколі з памяці людской не знікне подзвіг і мужнасць нашага народа, яго самаахвяраванне ў імя міру і шчасця на зямлі, – зазначыла перад пачаткам канцэрта ў Дакучыно яго вядучая Маргарыта Еўсявіцкая. – Крупшчына – зямля 17 Герояў Савецкага Саюза, зямля людзей, якія самааддана абаранялі сваю Радзіму, каб даць нам магчымасць жыць, працаваць і радавацца яснаму сонцу і блакітнаму небу. І наш канцэрт – даніна павагі тым, хто змагаўся на франтах Айчыннай, заваёўваючы Перамогу, нярэдка цаною ўласнага жыцця.
Тут жа была ўзгадана і гісторыя Дакучыно, якая пусціла свае карані ў далёкім 1624 годзе. На пачатак 1941 года ў гэтым населеным пункце налічвалася 64 гаспадаркі і пражывала 320 вяскоўцаў. У Вялікую Айчынную вайну гітлераўцамі спалена 25 гаспадарак, 34 жыхары забіты, 28 чалавек загінулі на фронце. Сёння ў вёсцы чырвоная зорачка змешчана толькі на адным доме, дзе жыве ветэран вайны Пётр Якаўлевіч Новікаў.
На сустрэчу з песняй сабралася шмат дакудаўцаў, і кожны нумар яны сустракалі апладысментамі. Ды і як не апладзіраваць народнаму ансамблю народнай песні «Жывіца», які ўжо 20 гадоў радуе жыхароў Крупшчыны сваімі выступленнямі, артыстам ансамбля цыганскай песні «Талісман» – Маргарыце Еўсявіцкай, Галіне Бандарык, Святлане Захар’евай, салістцы Юліі Грынь, Ігару Шалаумаву, які чытаў маналогі. Калі дзяўчаты выконвалі песню «Вёсачка» бабулі выціралі з вачэй слёзы, ды і ў артыстаў ад шчымлівых пачуццяў міжволі дрыжэлі галасы.
Не хацелі дакучынцы адпускаць гасцей, але іх чакалі ўжо ў Вялікім Камянцы. І ў гэтай вёсцы, а яна на 20 гадоў старэй за Дакучыно (паводле пісьмовых звестак вядома з 1604 года) шчыра і сардэчна віталі ўжо знаёмых нам артыстаў. Вяскоўцы, якія сабраліся дружным гуртам на адкрытай пляцоўцы ля аднаго з дамоў, таксама гаварылі аб тым, што вайна сваім чорным крылом закранула і Вялікі Камянец – на франтах Вялікай Айчыннай загінулі 12 чалавек. І ўжо ўнукі і праўнукі загінуўшых свята ўшаноўваюць іх памяць.
– Невыпадкова акцыя «Мы беларусы – мірныя людзі», назву якой далі радкі дзяржаўнага гімна, праходзіць у год 70-годдзя Вялікай Перамогі, – гаварыла намеснік начальніка аддзела ідэалагічнай работы, культуры і па справах моладзі райвыканкама Таццяна Мельнік. – Калі мы хочам, каб наша краіна заставалася такой, якой яна з’яўляецца сёння – мірнай, моцнай і працвітаючай, мы ўсе павінны захоўваць мір і спакой, лад і згоду на беларускай зямлі. І самае важнае – ніколі і нікому не аддаваць гістарычных заваёў нашага народа – суверэнную дзяржаву Рэспубліку Беларусь. Да месца сказаць, што па папярэдняму ўзгадненню са старшынямі сельвыканкамаў, нашы артысты да вяскоўцаў будуць выязджаць два разы на тыдзень.
