Усяго дзесяць дзён засталося да заканчэння падпісной кампаніі на ІІ паўгоддзе і ІІІ квартал. На бягучым тыдні акцыя «Абласны дзень падпісчыка» прайшла ва ўсіх аддзяленнях паштовай сувязі нашага раёна. Варта заўважыць, што толькі ў гэты дзень крупчане выпісалі 861 экзэмпляр газет і часопісаў. І перавага, дарэчы, аддавалася раённай газеце.Журналісты раёнкі, як і заўсёды, не прамінулі гэтай падзеі і наведалі паштовае аддзяленне сувязі Крупкі-1. І нас там ужо чакалі. Некаторыя прыхільнікі раённай газеты выпісалі сваё любімае выданне непасрэдна ў аддзяленні і прад’яўлялі нам абанементы, каб паўдзельнічаць у аб’яўленай рэдакцыяй акцыі: той, хто выпіша «Крупскі веснік» адразу на паўгода, атрымае бонус – бясплатную падпіску на студзень 2016 года. Асобныя ведалі, што раёнку можна выпісаць прама ў рэдакцыі ў грамадскага распаўсюджвальніка, таму і скарысталі гэту магчымасць. І толькі да нас у абласны дзень падпісчыка звярнулася 20 крупчан, якія выпісалі газету на паўгоддзе.
– Акцыя, аб’яўленая рэдакцыяй райгазеты, пасадзейнічала таму, што і ў гарадскім, і ў сельскіх аддзяленнях паштовай сувязі толькі за адзін дзень выпісана 276 экзэмпляраў раёнкі, з іх 67 – на паўгоддзе, – гаварыла начальнік Крупскага цэха паштовай сувязі Людміла Пацэева. – Асноўная мэта абласнога дня падпісчыка – актывізаваць падпісную кампанію, прыцягнуць увагу патэнцыяльных падпісчыкаў і стымуляваць рост падпісных тыражоў газет і часопісаў на ІІІ квартал і ІІ паўгоддзе 2015 года. І многія прачыталі аб’явы ў раённай газеце аб Дні падпісчыка і аб праводзімай акцыі, таму ахвотна заходзілі ў аддзяленні сувязі. Усе разам мы стараемся, каб друкаванае слова прыходзіла ў кожны дом.
Да месца адзначыць, што прыхільнікі раённай газеты, якія завіталі на гарадское аддзяленне паштовай сувязі, атрымлівалі ў падарунак і сувенірную прадукцыю – блакноты, ручкі, каляндарыкі – з лагатыпам «Крупскі веснік». У адрас газеты ад нашых даўніх і пастаянных чытачоў было выказана шмат шчырых і ўдзячных слоў. Тамара Лупіна, Людміла Валчок, Валянціна Красоўская, Галіна Сіняк, Таццяна Белая, Валянціна Білецкая адзначалі, што з газетай сябруюць ужо не адзін дзясятак гадоў, давяраюць ёй і не думаюць здраджваць свайму любімаму выданню.
Сёння – субота, 20 чэрвеня. Хочацца напомніць тым, хто яшчэ не выпісаў раённую газету, каб яны паспяшаліся. Час бяжыць вельмі хутка, не паспееце азірнуцца, як на календары будзе ліпень. І калі ў вас на руках будзе падпісны абанемент, то ўжо ў другі дзень гэтага месяца смела адчыняйце сваю паштовую скрынку – там вас будзе чакаць «Крупскі веснік»!
