Візітная картка: Іван Васільевіч Букач, нарадзіўся ў 1918 годзе ў горадзе Крэменчуг. У Чырвонай Арміі з 1937 года, лейтэнант, ваентэхнік. У 1942 годзе накіраваны за лінію фронту для актывізацыі падпольнага руху на акупіраванай гітлераўцамі тэрыторыі. Працаваў сакратаром Крупскага падпольнага райкама камсамола, які дзейнічаў на тэрыторыі раёна на базе партызанскага атрада «Гвардзеец».
Трэба адзначыць, што ўжо пры пераходзе праз лінію фронту група партызан, у складзе якой быў і Іван, была акружана карнікамі. Давялося трымаць цяжкі бой, але здолелі вырвацца з акружэння. Гэта было першае баявое выпрабаванне ў тыле ворага будучага камсамольскага важака. Букач актыўна ўдзельнічаў у баявых аперацыях партызан, разам з імі хадзіў «на жалезку», прымаў непасрэдны ўдзел у падрыве двух варожых эшалонаў, у выніку чаго былі знішчаны вагоны з боепрыпасамі і танкамі. Разам з партызанамі ён прыняў удзел у разгроме чатырох варожых гарнізонаў, у тым ліку на Крупшчыне ў вёсках Дубавое і Дзянісавічы. У яго баявой характарыстыцы адзначана наступнае: «Букач асабіста ўдзельнічаў у 29 баявых аперацыях партызан, у тым ліку ў «рэйкавай вайне», у 17 засадах. Быў тры разы паранены». У прыватнасці, падчас бою з вялікім атрадам карнікаў, нягледзячы на раненні, ён працягваў кіраваць і асабіста знішчыў 9 гітлераўцаў. Іван Букач быў ініцыятарам і фактычным рэдактарам выпуска газеты «Партызанскі шлях» на базе друкарні партызанскага атрада.
Гэтыя факты прыведзены ў прадстаўленні да ўзнагароды сакратара падпольнага райкама камсамола ордэнам «Айчыннай вайны».
Дарэчы, за свае баявыя справы ён быў таксама ўзнагароджаны медалём «Партызану Айчыннай вайны» першай ступені. Ва ўзнагародным лісце больш падрабязна раскрыта яго дзейнасць як камсамольскага важака: «Работая секретарем подпольного райкома ЛКСМБ, организовал в районе 18 подпольных комсомольских организаций, которыми проделана большая работа по оказанию помощи партизанским отрядам оружием и боевыми действиями. Только в одну партизанскую бригаду этими группами сдано 3 пулемета, 18 винтовок, большое количество медикаментов. Районная комсомольская организация за время работы тов. Букача выросла с 18 человек до 168 человек…».
У 1947 годзе Іван Букач узнагароджаны ордэнам Чырвонага сцяга.
Дзмітрый ХРОМЧАНКА, кандыдат гістарычных навук. Фота прадастаўлена аўтарам.
