Як ужо неаднаразова паведамлялася, у жніўні-верасні бягучага года такі агляд-конкурс праходзіў і ў нашым раёне. Пярвічныя ветэранскія арганізацыі разам з сельвыканкамамі праводзілі яго на месцах, вызначалі пераможцаў, а фотаматэрыялы прадастаўлялі ў арганізацыйны камітэт. Вынікі раённага агляду-конкурсу «Лепшае ветэранскае падвор’е-2017» былі падведзены на мерапрыемстве з нагоды Дня пажылых людзей, якое праходзіла ў раённым Цэнтры культуры. Першае месца тады было прысуджана Валянціне Кажаноўскай – жыхарцы вёскі Чырвоная Слабада Акцябрскага сельсавета. Прыгожа аформленая відэапрэзентацыя падвор’я Валянціны Іванаўны была прадстаўлена на абласны конкурс «Лепшае ветэранскае падвор’е». І вось на Крупшчыну прыйшла радасная навіна: сярод 9-ці прызёраў у намінацыях вызначана і падвор’е крупчанкі.
– Падвядзенне вынікаў абласнога конкурсу праходзіла на базе філіяла «Палац культуры ветэранаў», і мы былі запрошаны разам з Валянцінай Кажаноўскай, – расказаў старшыня раённай ветэранскай арганізацыі Уладзімір Кушнер. – Адразу заўважу, што кожнае падвор’е ўдзельнікаў конкурсу дастойна захаплення і павагі. Мы разумеем, што пастаянная праца нашых ветэранаў упрыгожвае не толькі сваё жыццё, але і садзейнічае навядзенню парадку на зямлі, з’яўляецца прыкладам для сваіх суседзяў. І было вельмі прыемна, што ў намінацыі «Агульны выгляд падвор’я» адзначана Валянціна Іванаўна, якой былі адрасаваны цёплыя словы віншаванняў, Дыплом прызёра і падарунак. І дадому яна вярталася з цудоўным настроем. Так трымаць!
Крупская ЦРБ информирует о возможности получить консультацию врача общей практики на базе УЗ «Крупская ЦРБ» 27 ноября. 
