– Дружна, зладжана працуюць усе корманарыхтоўшчыкі. Тым больш, што навічкоў у гэтай справе практычна няма. Усе вопытныя і старанныя, могуць параўноўваць работу на касавіцы ў папярэднія гады, – гаварыла галоўны аграном адкрытага акцыянернага таварыства «Крупскі райаграсэрвіс» Ілона Ляпеха. – Хаця і плошчы ўборкі траў у нас вялікія, але плануем закончыць касавіцу ў тэрмін, чым будзе забяспечаны добры задзел для паўнацэннага травастою на другі ўкос. На сённяшнюю раніцу ў нас нарыхтавана амаль 2 тысячы 498 тон сенажу, у тым ліку 175 тон у палімерную ўпакоўку. Закрыты ўжо тры сянажныя траншэі – дзве ў Вялікай Слабадзе і адна ў Гапонавічах, цяпер вядзецца закладка сенажу ў Начы. Пакуль шанцуе з надвор’ем. Ды і травастой нядрэнны. На «зялёным жніве» задзейнічаны два кормаўборачныя камбайны, каля дзесяці адзінак тэхнікі  працуюць штодзённа на адвозцы.

Ілона Уладзіміраўна расказала, што дакладна вырашаны пытанні аплаты працы ўдзельнікаў нарыхтоўкі кармоў, іх заахвочвання, а таксама харчавання. І ўсе механізатары шчыруюць. На кормаўборачных камбайнах заўсёды паказваюць прыклад іншым Ігар Дзядовіч і Вячаслаў Ігнаткоў. З граблямі заняты Аляксандр Колесень і Сяргей Асіпенка, на адвозцы на трактарах з прычэпамі – Рыгор Шахрай, Юрый Худалей і Васіль Худалей, Сяргей Кляшчонак і Уладзімір Квяткоўскі, на аўтамашынах «МАЗ» – Уладзімір Богдан і Юрый Кірэеў, «Урал» – Андрэй Пацэеў і Сяргей Федарцоў. Трамбоўкай сянажнай масы трактарам «Джон дир» займаецца Валерый Лукашэнка, «Амкадор-302» – Алег Булахаў, а ў начную змену – Дзяніс Чугай.

Толькі добрыя словы былі сказаны галоўным аграномам і ў адрас прасаўшчыка сена Юрыя Шыдлоўскага, прасаўшчыка сена і сенажу ў палімерную ўпакоўку – Сяргея Невядомскага, тых, хто косіць травы – Віктара Курта, Георгія Грыдзюшкі, Рыгора Гапеева, Максіма Часновіча, Сяргея  Белага, Яўгена Вішняка.

– Усе проста малайцы! – дадала Ілона Уладзіміраўна. – Хлопцы разумеюць, што ні ў якім разе нельга ўпусціць лепшыя тэрміны ўборкі, таму, выкарыстоўваючы сучасную тэхніку, і стараюцца. 

Па ўсім адчувалася, што нарыхтоўка кармоў у таварыстве ўзята пад строгі кантроль, асаблівая ўвага ўдзяляецца захаванню тэхналогіі закладкі сенажу, нарыхтоўкі сена.