Шматгадовыя травы ў ААТ “МайскаеАгра” скошаны ўжо на плошчы 1527 гектараў, што складае 77% да задання. Засталося скасіць усяго 448 гектараў. І па тым, як тут шчыруюць корманарыхтоўшчыкі, можна меркаваць, што да заканчэння ўборкі траў першага ўкосу засталіся лічаныя дні.На дзень наведвання намі гэтай гаспадаркі выконваючы абавязкі дырэктара Генадзь Ладоўскі расказаў, што стараюцца працаваць шчыра і самааддана літаральна ўсе.
– У нас нарыхтавана 596 тон сена, з іх 386 тон у палімернай упакоўцы. У сянажныя траншэі закладзена звыш сямі тысяч тон сенажу. У палімернай упакоўцы яго назапашана 379 тон, – працягваў Генадзь Вячаслававіч. – Пры закладцы сенажу перавагу аддаём якасці. Пры праверцы будучага корму спецыялісты даюць станоўчую адзнаку. Усе корманарыхтоўшчыкі ведаюць, каб травяныя кармы атрымаліся пажыўнымі, іх трэба нарыхтоўваць у аптымальна-сціслыя тэрміны і па вегетацыі раслін, і па закладцы ў траншэі. Крыху ўпусціш – згубіш і якасць, і аб’ёмы.
– На сённяшні дзень ужо закладзены тры сянажныя траншэі ля малочнатаварнага комплексу ў Худаўцах, адна – у Майску, па дзве траншэі – у Ротані і Ігрушцы, – уступіла ў размову брыгадзір паляводчай брыгады “Ротань” Жанна Ксяндзова, якая кантралявала закладку сянажнай масы ля МТК “Худаўцы”. – Перад касавіцай была праведзена нарада, на якой яшчэ раз растлумачылі корманарыхтоўшчыкам, якімі павіны быць вышыня зрэзу траў, здрабненне, рэгуліроўка машын, як павінны правяльвацца маса і рыхтавацца траншэі. І цяпер нарыхтоўка кармоў знаходзіцца на строгім кантролі, бо ад яе будзе залежаць вытворчасць жывёлагадоўчай прадукцыі.
Да месца адзначыць, што ў дадзеным акцыянерным таварыстве ўжо нарыхтавана на ўмоўную галаву жывёлы па 14,99 цн кармавых адзінак, што з’яўляецца самым лепшым паказчыкам у параўнанні з іншымі гаспадаркамі. Летась на гэты час гэта лічба раўнялася толькі 5,61 цн к.адз. На ўкос у “МайскаеАгра” мабілізаваы ўсе сілы: задзейнічана тэхніка, на палях і сянажных траншэях пастаянна дзяжураць спецыялісты. “Самае галоўнае – убраць травы ў аптымальнай фазе, з максімальным утрыманнем у іх пратэіну, самым высокім выхадам сухога рэчыва, – тлумачыў Генадзь Ладоўскі. – І задача – не дапускаць страт пажыўных рэчываў – выконваецца”.
У гэтым мы пераканаліся, пагутарыўшы з механізатарамі, якія былі заняты на корманарыхтоўцы. Сяргей Гара зазначыў, што напярэдадні, каб прыступіць да работы з самай раніцы, рамантаваў сваю тэхніку да дзвюх гадзін ночы. Заўсёды перавыконвае даведзеныя заданні Аляксандр Шэдка, які заняты адвозкай сянажнай масы. Амаль усе закладзеныя ў гаспадарцы сянажныя траншэі ўтрамбаваў трактарам “Амкадор-352” Валерый Мазнёў. Зладжана працуюць і многія іншыя корманарыхтоўшчыкі ААТ “МайскаеАгра”. Яны помняць распаўсюджанае меркаванне нямецкіх фермераў, якія лічаць, што “чысты корм важней, чым чыстае поле”.
Фота Аляксандра БУДЗЬКО.
