– Органам дзяржстатыстыкі – 95 гадоў. За гэтымі лічбамі – мінулае, сённяшняе і будучае нашай рэспублікі, лёсы людзей. Бо менавіта статыстыка дакладна ведае, колькі прадукцыі, выпушчанай прадпрыемствамі, пайшло на экспарт, на ўнутраны рынак і колькі чакае сваёй чаргі на складах. Статыстыка мае дакладнае ўяўленне аб дасягненнях кожнай галіны народнай гаспадаркі і ў цэлым аб дабрабыце краіны. Велізарны попыт на дадзеныя статыстыкі і ў інтэрнэце. Сумнай яе называюць толькі недасведчаныя людзі.

Для забеспячэння органаў дзяржаўнага кіравання і грамадскасці вобласці аб’ектыўнай і актуальнай інфармацыяй супрацоўнікамі галоўнага статыстычнага ўпраўлення Мінскай вобласці штогод рыхтуецца каля 4,5 тысяч бюлетэняў і 700 экспрэс-інфармацый аб эканамічнай і дэмаграфічнай сітуацыі на Міншчыне, а таксама аб працоўных рэсурсах, занятасці і ўзроўні жыцця насельніцтва. Упэўнена, што ўважлівыя чытачы раённай газеты заўважаюць на яе старонках прэс-рэлізы галоўнага статыстычнага ўпраўлення, якія датычаць Крупскага раёна.

Што ўваходзіць у сферу нашай дзейнасці? У першую чаргу, гэта збор статыстычнай справаздачнасці ад рэспандэнтаў – розных арганізацый, устаноў горада і раёна, індывідуальных прадпрымальнікаў. Наогул, нам пастаянна даводзіцца мець справу з вялікай масай інфармацыі: збіраць дадзеныя, сістэматызаваць і ўпарадкоўваць іх, даваць колькасную ацэнку з’явам, адсочваюць тэндэнцыі. У цэлым, дзяржаўная статыстыка сёння – гэта добра адладжаная сістэма збору, апрацоўкі і перадачы статыстычнай інфармацыі на базе сучасных камп’ютарных тэхналогій. Дзяржаўная праграма стварэння адзінай інфармацыйнай сістэмы дзяржаўнай статыстыкі дазволіла стварыць новую сучасную платформу па аўтаматызацыі ўсіх працэсаў статыстычнай вытворчасці – ад тэхналогіі збору інфармацыі ў электронным фармаце да стварэння базы гатовых дакументаў, якія ўтрымліваюць табліцы, графікі, аналітычныя і метадычныя матэрыялы. І больш 90% рэспандэнтаў нашага раёна аддалі перавагу менавіта такому віду прадстаўлення інфармацыі ў орган статыстыкі. 

Асноўныя прынцыпы нашай работы – гэта даставернасць, аб’ектыўнасць і аператыўнасць статыстычнай інфармацыі. Яна павінна адлюстроўваць рэальную сітуацыю ў эканоміцы і сацыяльнай сферы. І не сакрэт, што аб’ектыўнасць і якасць статыстычнай інфармацыі ў першую чаргу залежыць ад даставернасці справаздачных дадзеных, прадстаўляемых органам дзяржстатыстыкі прадпрыемствамі і арганізацыямі, а іх у нас, разам са структурнымі падраздзяленнямі, больш 300. Таму пытанні якасці і праўдзівасці паступаючай справаздачнасці і знаходзяцца пад самай пільнай увагай. 

У нас невялікі, але дружны і зладжаны калектыў: мой непасрэдны начальнік Алена Карэцкая, галоўны эканаміст Ганна Федаровіч, спецыялісты па правядзенні абследаванняў Святлана Невядомская і Ірына Карань. Зазначу, што ў нашай прафесіі, якая патрабуе ўседлівасці, вытрымкі і самавалодання, выпадковых людзей няма. Шчырыя словы прызнанасці хочацца адрасаваць нашым шаноўным ветэранам працы – Марыі Пятроўне Карнілавай, Кацярыне Уладзіміраўне Ляхновіч, Ніне Іванаўне Бундзель, Надзеі Аляксандраўне Сасуноўскай, Кацярыне Аляксееўне Грыгаровіч, Аліне Леанідаўне Толкач, Алене Фёдараўне Ерахавец, Веры Іванаўне Барадач і Наталлі Мікалаеўне Арэхавай. Мы заўсёды рады бачыць іх у аддзеле, чуць парады, словы падтрымкі. Напярэдадні прафесійнага свята жадаю ўсім супрацоўнікам аддзела статыстыкі, а таксама ветэранам здароўя, бадзёрасці і аптымізму. Вялікі дзякуй за адданасць справе, за штодзённую карпатлівую працу. Радасці ўсім, поспехаў і ўдачы!