– Варта адзначыць, што стараліся ўсе, – зазначыў старшыня Хацюхоўскага сельвыканкама Віктар Кострыкаў. – Пагадзіцеся, што магазін на вёсцы – гэта і месца, дзе можна купіць усё самае неабходнае, як кажуць, не адыходзячы ад дому. Гэта і месца сустрэчы, дзе можна абмеркаваць навіны і падзеі. Недарэмна ж, Адзіныя дні інфармавання таксама праходзяць альбо ў магазінах, альбо ля прыпынкаў аўталавак. І, дарэчы, у вёсцы Вялікае Восава пражываюць каля 150 чалавек. Так што, гандлёвая кропка проста неабходна.

Пад вечар 28 снежня мы завіталі ў магазін. Па ўсім адчувалася, што тут рыхтаваліся загадзя. Нягледзячы на параўнаўча невялікі памер гандлёвай кропкі, мы заўважылі неблагі асартымент тавараў штодзённага карыстання. На паліцах – хлеб, батоны, мука, цукар, алей, безалкагольныя напіткі і сокі, торты вытворчасці магазіна “Кулінарыя” г. Крупкі, сыры, як нам падказалі, ажно 12 відаў каўбасных вырабаў, малочныя прадукты, макаронныя вырабы і многае іншае. Якраз падчас нашага знаходжання ў магазіне завезлі фрукты – мандарыны, апельсіны, яблыкі, а таксама капусту, моркву, сталовыя буракі. Да месца адзначыць, што ёсць і прадукты па пераднавагодняй акцыі.

– Мы вельмі рады, што ў нас зноў адкрыўся магазін, – гаварыла мясцовая жыхарка Тамара Кухта. – Прывыклі да яго, ведалі, калі будзе прывоз. Аднак не хачу наракаць і на аўталаўку, якая прыходзіла да нас тры разы на тыдзень. Тут таксама ўсё было, ды і вадзіцелі-прадаўцы вельмі шчырыя і адказныя. Але ж часам яе, пакуль пад’едзе, трэба было чакаць. Цяпер жа ведаем расклад работы магазіна, таму і будзем разлічваць час на яго наведванне. Ды і выбар тут большы і лепшы.

– А гэта гандлёвая кропка напачатку будзе працаваць з 9.00 да 16.00 у аўторак, чацвер і суботу – у тыя дні, калі завозіцца хлеб, – дадала начальнік рознічна-гандлёвага ўчастка райспажыўтаварыства Наталля Карпека, якая прымала самы непасрэдны ўдзел у падрыхтоўцы магазіна да яго адкрыцця. – Ды і прадаўца мы добра ведаем. Гэта – Таццяна Браніславаўна Лабаноўская, якая загадвае лаўкай на даму ў суседняй вёсцы Ігрышча. Упэўнена, што з ёй знаёмы і многія іншыя вяскоўцы, бо неаднойчы звярталіся туды.

Усе мясцовыя жыхары, якія прыйшлі ў свой магазін, выказвалі падзяку за яго адкрыццё раённай і мясцовай уладам, раённаму спажывецкаму таварыству. Пагадзіцеся, напярэдадні вялікіх пакупак да навагодніх і калядных святаў лепшага падарунка і не пажадаеш.