Для павышэння інфармаванасці кіраўнікоў дзяржаўных структур і іх падраздзяленняў усіх форм уласнасці па пытаннях прававога забеспячэння прадпрымальніцкай і гаспадарчай дзейнасці антыкарупцыйнага заканадаўства Крупскім райвыканкамам і Мінскай абласной арганізацыйнай структурай рэспубліканскага дзяржаўна-грамадскага аб’яднання «Беларускае таварыства «Веды» быў праведзены інфармацыйна-практычны семінар «Сістэма мер па супрацьдзеянні карупцыі».

– Як вядома, пытанням барацьбы з даным злом удзяляецца вялікая ўвага з боку  Прэзідэнта і Урада Рэспублікі Беларусь, – зазначыў старшы выкладчык інстытута бізнесу і менеджменту тэхналогій БДУ Аляксандр Папоў. – Аднак  супрацьдзеянне карупцыі ва ўсіх сферах жыцця дзяржавы толькі забароннымі метадамі і сіламі праваахоўных органаў не дазволіць дасягнуць жадаемых вынікаў. Неабходна больш актыўнае прыцягненне грамадскасці да супрацоўніцтва па пытаннях выяўлення і супрацьдзеяння карупцыі, а таксама фарміравання нецярпімасці да яе праяўленняў.

Прысутным былі паказаны кадры з кінафільма «Белае сонца пустыні», у якіх прагучалі добра вядомыя ўсім словы мытніка Верашчагіна: «Я хабару не бяру. Мне за дзяржаву крыўдна». Была прыведзена таксама наступная вытрымка са Старога Запавету: «Ва ўсе часы, ва ўсіх народаў хабар асуджваўся».

Дакладчык гаварыў аб агульнай характарыстыцы карупцыі ў сістэме грамадскіх адносін, даў параўнаўчы і гістарычны аналіз паняцця і прыкмет карупцыі.

– У перакладзе з лацінскай мовы карупцыя  азначае подкуп, падкупнасць і прадажнасць грамадскіх і палітычных дзеячаў, дзяржаўных чыноўнікоў і службовых асоб, – адзначыў Аляксандр Папоў. – Карумпіраваць – значыць падкупляць каго-небудзь грашыма або іншымі матэрыяльнымі дабротамі. Афіцыйнае тлумачэнне карупцыі змешчана ў артыкуле 1 Закона Рэспублікі Беларусь «Аб барацьбе з карупцыяй».

Падчас работы семінара размова ішла аб відах і формах карупцыі, прычынах і ўмовах яе распаўсюджвання, негатыўных сацыяльных наступствах. Даючы агульную характарыстыку механізму карупцыйных паводзін, быў выведзены партрэт карупцыянера. Аказваецца, 80% карупцыянераў – мужчыны, 74% – жанатыя, 62% – ва ўзросце 31-40 гадоў, 86% – з вышэйшай адукацыяй. Тут жа было адзначана, што ў характары карупцыянера перавалодваюць устойлівы матыў карыслівай накіраванасці, уладарнасць, непавага да закону.

Вялікі інтарэс прысутных выклікалі абмеркаванні пытанняў, як, да прыкладу, чаму мы даем хабар, ці пакутуюць карупцыянеры раскаяннем і мукамі сумлення, якія правапарушэнні ствараюць умовы для карупцыі і інш.

Дакладчык расказаў таксама пра карупцыйныя правапарушэнні супраць інтарэсаў службы, пры ажыццяўленні закупак, у працэсе ажыццяўлення адміністрацыйных працэдур, у сферы кантрольна-дазвольнай дзейнасці, гаварыў аб юрыдычнай адказнасці за карупцыйныя правапарушэнні.

– Да карупцыйных злачынстваў адносяцца атрыманне хабару (арт. 430 Крымінальнага кодэкса), дача хабару (арт. 431 КК), пасрэдніцтва ў хабарніцтве (арт. 432 КК), прыняцце незаконнага ўзнагароджвання (арт. 433 КК), – працягваў ён. – І кожнае з іх караецца пазбаўленнем волі. Але, нягледзячы на такія суровыя меры, мы час ад часу чытаем аб тым ці іншым аналагічным злачынстве. Перад прыездам у Крупкі я зрабіў выбарку фактаў хабарніцтва па вашым раёне. На жаль, гэта адмоўная з’ява не абышла бокам і Крупшчыну.

Аляксандр Папоў прывёў таксама факты карупцыйных злачынстваў па рэспубліцы і Мінскай вобласці, расказаў аб садзейнічанні дзяржаўным органам, якія ажыццяўляюць барацьбу з карупцыяй, аб рабоце антыкарупцыйных камісій, этычных стандартах і правілах антыкарупцыйных паводзін, этычных абавязках кіраўніка і падпарадкаваных, вопыце замежных краін у рэгламентацыі пытанняў службовай этыкі, міжнародным супрацоўніцтве ў сферы супрацьдзеяння карупцыі і інш.

Падчас практычнай часткі семінара яго слухачы абмеркавалі сітуацыйныя задачы і правялі ролевыя гульні. Тут жа былі падведзены вынікі анкетавання па праблемах супрацьдзеяння карупцыі, дадзены адказы на пытанні прысутных і ўручаны сертыфікаты аб праходжанні навучання.