Падабраць вакансію, дапамагчы аформіць групу інваліднасці, адправіць на лячэнне ад алкагольнай залежнасці... Камісія па садзейнічанні занятасці, якая дзейнічае ў раёне з красавіка бягучага года і якую ўзначальвае старшыня раённага Савета дэпутатаў Ігар Часнок, спрабуе ахапіць куды больш задач, чым працаўладкаванне. Камісія збіраецца чатыры разы ў месяц. Два пасяджэнні праходзяць у горадзе і два – на вёсцы. Практыка апраўданая: тры чвэрці тых, хто звяртаецца, жывуць у сельскай мясцовасці. Пра пасяджэнні камісіі даюцца аб’явы ў раённай газеце і ў сацыяльных сетках.У склад камісіі ўваходзяць спецыялісты службы занятасці, упраўлення па адукацыі, раённага аддзела ўнутраных спраў, жыллёва-камунальнай гаспадаркі, цэнтральнай раённай бальніцы, старшыня раённага аб’яднання прафсаюзаў, юрысты. На апошнім пасяджэнні, якое адбылося на мінулым тыдні ў райвыканкаме, прысутнічаў і карэспандэнт раённай газеты. На гэты раз на пасяджэнне запрашалася 17 чалавек, якім патрабуецца работа. Прыйшло 11 чалавек.
Перад членамі камісіі – непрацуючы жыхар г.п. Бобр Віталь. Апошняе месца работы – воінская часць 29253, з якой ён звольніўся месяц таму. «З’явяцца грошы, тады прайду медыцынскую камісію і буду ўладкоўвацца на агракамбінат «Дзяржынскі». Віталю параілі не цягнуць час, а прайсці медкамісію за кошт сектара па занятасці і як мага хутчэй уладкавацца.
Апошняе месца работы наступнага беспрацоўнага – ТАА «Амкадор-Можа». Аднак у сваёй працоўнай дзейнасці яму перашкодзіла чарка. Таму і быў звольнены. «Планую ўладкавацца на пілараму», – так запэўніваў ён. У сваю чаргу члены камісіі будуць трымаць на кантролі пытанне працаўладкавання хлопца.
Не змагла сябе знайсці ў прафесіі і Юлія. Адразу працавала ў цэнтральнай раённай бальніцы, але была звольнена. Пайшла на пілараму, аднак папрацавала толькі адзін дзень – цяжка. Камісія прапанавала ёй работу, папярэдне дамовіўшыся з кіраўніцтвам арганізацыі. Будзем меркаваць, што яна працаўладкуецца.
Практычна не было прэтэнзій да Аркадзя, які ў свой час працаваў сацыяльным работнікам, а затым, пакуль быў сезон, збіраў ягады і здаваў нарыхтоўшчыкам. Але ж працаваць усё роўна трэба. Таму камісіяй і быў вызначаны тэрмін: уладкавацца на работу не пазней, чым праз два тыдні.
Пакуль што свой законны адпачынак выкарыстоўвае Юрый. Але ў яго ёсць планы на работу, якія ў далейшым ён абмеркаваў з намеснікам начальніка ўпраўлення – загадчыкам сектара па занятасці Тамарай Карань.
Пастаянна дзеючай камісіяй па каардынацыі работы па садзейнічанні занятасці насельніцтва праведзена 17 пасяджэнняў, з іх 7 у выязной форме: у Крупскім, Бобрскім, Халопеніцкім, Хацюхоўскім (двойчы), Ухвальскім, і Акцябрскім сельсаветах. На пасяджэнні запрашаліся 266 чалавек, у тым ліку са звольненых у бягучым годзе – 96 чалавек. За садзейнічаннем у працаўладкаванні ў камісію звярнуліся 108 чалавек, з іх 77 атрымалі накіраванні (37 чалавек працаўладкаваны, 7 – адмовіліся ад усіх прапаноў камісіі, 19-ці аказана кансультацыйная дапамога, 5 чалавек накіраваны ў службу занятасці).
Старшыня камісіі час ад часу званіў кіраўнікам тых або іншых арганізацый, каб знайсці працоўныя месцы для Алены, Ганны, Максіма, Уладзіміра, Ігара. Як адзначыла Тамара Карань, адзін з беспрацоўных, жонка якога інвалід І групы, аформлены па догляду за ёй. Наогул, любому беспрацоўнаму можна звярнуцца ва ўпраўленне па працы, занятасці і сацыяльнай абароне райвыканкама, дзе прапануюць вакансіі або магчымасць прайсці перанавучанне.
– Нагадаю, што, згодна з Дэкрэтам № 1, з першага студзеня працаздольныя непрацуючыя грамадзяне будуць цалкам аплачваць субсідаваныя дзяржавай камунальныя паслугі. Калі ёсць жаданне, работу можна знайсці заўсёды, – зазначыла Тамара Карань. – У нашу службу часта звяртаюцца з такімі просьбамі. Але здараецца і так, што дапаможаш, а праз некаторы час з-за паводзін нядбайнага работніка сорамна кіраўнікам у вочы глядзець. Хачу звярнуцца да незанятых грамадзян: прыходзьце са спісам неабходных дакументаў, і мы абавязкова падбяром варыянт працаўладкавання.
І сапраўды, камісія спрабуе знайсці работу для кожнага. Аднак падыход тут адзін: адновіш стасункі з алкаголем – ёсць магчымасць з’ехаць у лячэбна-працоўны прафілакторый, калі не – ёсць усе шанцы выбрацца з багны.
– Работа з асацыяльнымі элементамі ў раёне арганізавана на належным узроўні, – упэўнены Ігар Часнок. – Цесная сувязь існуе паміж прадстаўнікамі гарадскіх і сельскіх пунктаў аховы грамадскага правапарадку, упраўленнем па працы, занятасці і сацыяльнай абароне райвыканкама. Аднак, як бы мы не імкнуліся працаўладкаваць, ёсць яшчэ і такія, што не звяртаюцца да наймальнікаў, з якімі ўжо была папярэдняя дамоўленасць. Гэта, у сваёй большасці, асобы, якія маюць судзімасць і вядуць амаральны лад жыцця. Нізкая матывацыя да працы дадзенай катэгорыі і з’яўляецца галоўнай праблемай у рэалізацыі Дэкрэта № 1. Тым не менш работа не спыняецца. Такая катэгорыя людзей знаходзіцца на пастаянным кантролі ў работнікаў раённага аддзела ўнутраных спраў, цэнтральнай раённай бальніцы. Важна памятаць, што ўсё залежыць ад чалавека. У нас няма самамэты змагацца з такімі людзьмі, мы змагаемся за тое, каб дапамагчы ім знайсці работу і змяніць жыццё да лепшага.
