Садзейнічанне падтрыманню ў належным стане земляў ляснога фонду з’яўляецца абавязкам кожнага грамадзяніна. Разам з тым, па-ранейшаму актуальнай застаецца праблема несанкцыянаваных звалак будаўнічых і бытавых адходаў, іншых пабочных прадметаў у лясах, якія прымыкаюць да аўтамабільных і чыгуначных дарог, вакол населеных пунктаў, садаводчых таварыстваў, на пляцоўках адпачынку і аўтастаянках.

– Менавіта для прыцягнення мясцовага насельніцтва, моладзі, грамадскасці да дзейнасці лясной гаспадаркі 19 кастрычніка бягучага года і праводзілася рэспубліканская добраахвотная акцыя «Чысты лес», – адзначыла намеснік дырэктара Крупскага лясгаса па ідэалагічнай рабоце Наталля Камовіч. – Напярэдадні ў нас была створана рабочая група, распрацаваны і зацверджаны план мерапрыемстваў па падрыхтоўцы і правядзенні добраахвотнай акцыі, вызначаны аб’екты. У школах раёна былі праведзены лекцыі аб значэнні лесу. Толькі за адзін суботні дзень 19 кастрычніка больш чым з дваццаці вызначаных аб’ектаў было ўбрана 2,3 куб. м смецця, пасаджана каля 12 тысяч дрэў – у асноўным елка і сасна.

Далей Наталля Камовіч расказала, што ў добраахвотнай акцыі прыняло ўдзел каля 400 чалавек. Гэта – работнікі лясгаса, вучні сярэдняй школы імя Уладзіміра Крыштопенкі пасёлка Крупскага, прадстаўнікі пракуратуры, Крупскага раёна газазабеспячэння філіяла ПУ «Барысаўгаз», раённай арганізацыі грамадскага аб’яднання «Белая Русь» і «БРСМ». Работнікі Сяляўскага лясніцтва, у прыватнасці, убіралі берагі возера Сялява, зоны адпачынку «Залаты рог» і «Шып», Бобрскага доследна-вытворчага лясніцтва – навялі парадак на тэрыторыі ля помніка Герою Савецкага Саюза Васілю Чабатарову і ля месца адпачынку «Крыніца», што на рацэ Бобр, Крупскага лясніцтва  – убіралі берагі возера Лясное і квартал 72, што ў пасёлку Крупскім. Наогул, літаральна ўсімі лясніцтвамі і добраахвотнікамі былі ўбраны месцы адпачынку, вызначаныя кварталы, асаблівая ўвага ўдзялялася ачыстцы лесу паблізу населеных пунктаў.