У Каласоўскай сярэдняй школе створана выстава «Міншчына – скарбонка краявідаў». Экспазіцыя складаецца з малюнкаў. Іх стварылі 8-класніца Аліна Карпенка і 9-класніца Ірына Макарэвіч. Юныя мастачкі наведваюць клас малюнка і жывапісу Крупскай дзіцячай школы мастацтваў.

– Наша краіна, у тым ліку і Міншчына, багатая на прыродныя краявіды, – кажа Аліна Карпенка. – Яны так маляўніча апісваюцца беларускімі пісьменнікамі ў шматлікіх літаратурных творах, з’яўляюцца матывамі карцін мастакоў. Ды мы і самі жывём у раёне, які славіцца разнастайнасцю лясоў, рэк, балот. А якая ж прырода без жывёл?  Шчыра кажучы, я вельмі люблю жывёл і птушак, таму часцей за ўсё малюю іх, ужо назапасіла значную кале­кцыю работ. Творы з выявамі ваўка, лісіцы, сінічкі і пейзажамі вы бачыце на выставе, прысвечанай 85-гадоваму юбілею нашай Мінскай вобласці.

– На выставе прадстаўлены мае работы жывапісу, – працягвае знаёмства Ірына Макарэвіч. – Гэта наша прыроднае багацце. Пагадзіцеся, што беларускія краявіды маюць вялікую колькасць фарбаў і адценняў.  Яны так і просяцца, каб іх намалявалі. Разам з бацькамі мы часта ездзім на прыроду. Летам любім бываць на возеры Сялява. У хуткім часе планую адлюстраваць яго на паперы. У шэрагу маіх работ ёсць малюнкі з выявамі ракі Бобр, куточкам малой ра­дзімы – Замкоў. Усё гэта разам і ёсць наша родная Міншчына.

Падчас наведвання Бобрскай сярэдняй школы ля выставы, прысвечанай сталічнаму рэгіёну, было шматлюдна. Гэта прыйшлі вучні з групы падоўжанага дня на азнаямляльную экскурсію.

– Выстава складаецца з двух раздзелаў, – распавядае дырэктар Вераніка Голец. – Гэта гістарычныя звесткі і сучасныя факты пра Мінскую вобласць. У гэтым навучальным годзе нашы вучні шмат вандравалі. Яны наведалі літаратурны музей Якуба Коласа ў Мінску, музейны комплекс старажытных народных рамёстваў і тэхналогій «Дудуткі», БелАЗ, мемарыяльны комплекс «Хатынь», музей Вялікай Айчыннай вайны ў Мінску. Фотаздымкі з экскурсій і складаюць другі раздзел экспазіцыі – славутыя мясціны Міншчыны.

Іна ГАРА.