На адной з іх мы пабывалі. У гарадской сярэдняй школе № 1 ладзілася патрыятычнае мерапрыемства «Мы ганарымся, што мы беларусы». Удзельнікі – вучні 8 класа. Падчас імпрэзы школьнікі падрабязна даведаліся пра гісторыю Канстытуцыі, яе структуру, асноўныя раздзелы і артыкулы. Разам з класным кіраўніком Аленай Дзянісавай юныя грамадзяне абмеркавалі свае правы і абавязкі. Падрабязна спыніліся на дзяржаўнай сімволіцы. Цікава прайшла анлайн-віктарына «Што вы ведаеце пра Асноўны Закон краіны?»

Вучні зрабілі свае вывады і падзяліліся з намі ўражаннямі.

Кацярына СІНІЦЫНА:

– Канстытуцыя – гэта Асноўны Закон краіны, які вызначае яе грамадскі і дзяржаўны ўклад, парадак і прынцыпы ўтварэння органаў улады. Канстытуцыя яднае ўсіх беларусаў. Як вядома, любая дзяржава моцная сваёй еднасцю. У нас ёсць шматгадовыя традыцыі, мы маем магчымасць вучыцца, удасканальвацца, развівацца ў мірнай краіне.

Дзмітрый ГАЛАДОК:

– Кожны з нас павінен думаць пра сваё жыццё, займаць актыўную грамадзянскую пазіцыю, выконваць нормы і правілы, устаноўленыя грамадствам і законам. Ад нас, маладога пакалення, залежыць росквіт краіны, у якой будуць жыць нашы нашчадкі.

Максім КАЗАК:

– Сімвалічна, што Дзень Канстытуцыі Рэспублікі Беларусь становіцца асабліва значным для многіх юнакоў і дзяўчат. Бо менавіта 15 сакавіка самым актыўным у грамадскім жыцці школы вучням, якім споўнілася 14 гадоў, урачыста ўручаюць пашпарты. Разам з гэтым падзея становіцца напамінкам аб тым, што на нас ляжыць вялікі абавязак – быць сапраўднымі грамадзянамі і патрыётамі сваёй краіны.

Іна ГАРА.