Чытачы бібліятэкі праяўляюць актыўнасць і не праходзяць міма выставы. Тут прадстаўлена актуальная інфармацыя па правядзенні адзінага дня галасавання – Канстытуцыя Рэспублікі Беларусь, Выбарчы кодэкс Рэспублікі Беларусь, памятка для выбаршчыкаў і іншая.
– У грамадска-палітычным жыцці нашай краіны з’явіўся ключавы элемент электаральнай кампаніі – адзіны дзень галасавання, – расказвае дырэктар бібліятэкі Юлія Крыгіна. – Паводле Канстытуцыі, ён праводзіцца ў апошнюю нядзелю лютага. Кожны выбаршчык на гэты раз атрымае не адзін бюлетэнь, а два, тры, а то і чатыры. Чатыры атрымаюць вяскоўцы. Ім давядзецца, акрамя дэпутатаў Палаты прадстаўнікоў, абласнога і раённага Саветаў, абраць яшчэ сваіх вылучэнцаў у сельскі Савет дэпутатаў. Такім чынам, у адзін дзень у краіне мае быць створана дэпутацкая вертыкаль. Пагадзіцеся, у арганізацыйным плане гэта вельмі зручна для ўсіх удзельнікаў электаральнай кампаніі, асабліва для выбаршчыкаў.
Да правядзення адзінага дня галасавання застаецца менш за месяц. Электаральная кампанія – яшчэ адзін важны гістарычны момант для нашай краіны. Крупчане гэта добра ўсведамляюць.
– Удзел у выбарах – гэта не толькі магчымасць выказаць сваю думку, – дзеліцца Анастасія Зізіка. – Яшчэ гэта ўсвядомленая адказнасць перад грамадствам за сваё рашэнне. Народ прыме рашэнне, якім будзе шлях развіцця краіны. Выбары – адна з форм удзелу грамадзян у жыцці краіны. Аддаючы голас за таго ці іншага дэпутата, мы робім свой маленькі ўклад у нашу агульную будучыню. Упэўнена, што народныя выбраннікі стануць годнымі прадстаўнікамі свайго народа, мы будзем галасаваць менавіта за такіх.
