Педагог СШ № 3 г. Крупкі далучылася да рэспубліканскай праграмы.
«Настаўнік для Беларусі» – праект, які падтрымлівае педагогаў у іх імкненні стаць лідарамі ў адукацыі. Удзельнікі праграмы на працягу двух гадоў працуюць у звычайных школах, каб забяспечыць роўнасць адукацыйных магчымасцяў для навучэнцаў.
Вера Свідзерская, настаўнік беларускай мовы і літаратуры, рускай мовы і літаратуры, – удзельніца сёмага набору, а СШ № 3 г. Крупкі стала школай-партнёрам рэспубліканскай праграмы. Ёй ужо шэсць год. Чула пра яе настаўнік з самага першага набору. Але далучыцца спыняла адна ўмова – неабходна было змяніць месца жыхарства і пераехаць туды, куды накіруюць па праграме. З часам умовы змяніліся. Вера Сяргееўна вырашыла дзейнічаць.
– Чаму я выбрала гэту праграму? Таму што яе місія вельмі мне блізкая. Кожны вучань павінен мець магчымасць раскрыць сябе. У мяне час ад часу ўзнікаюць думкі, што я нарадзілася настаўнікам. Ні на адну хвіліначку не пашкадавала, што абрала педагагічны шлях. Для мяне дзеці ўсе аднолькавыя незалежна ад паспяховасці. Я ўпэўнена, што ёсць такія таленты, якія проста трэба развіваць, – адзначае Вера Свідзерская. – Штосьці падказвала – гэта маё месца. Самым складаным крокам было адважыцца запоўніць анкету. Гэта асазнанне таго, што ты звязваеш сябе на два гады з пэўнымі абавязкамі. Я – чалавек настойлівы. Калі адчуваю, што гэта маё, не бачу перашкод, заўсёды іду да сваёй мэты.
Першае выпрабаванне – анкета з даволі сур’ёзнымі пытаннямі – паспяхова было пройдзена. Затым эсэ пра свае намеры адносна праграмы. А далей – вельмі цікавае і незвычайнае заданне: урок даўжынёю ў сем хвілін. Адметнасцю ўрока было тое, што яго правядзенню запланавана перашкаджалі размовамі, тэлефоннымі званкамі, стуканнем, груканнем. Сапраўдная праверка на стрэсаўстойлівасць.
З шэрагу настаўнікаў да летняга інтэнсіву (яшчэ адзін з этапаў) засталося толькі дваццаць. Амаль што месяц педагогі былі на своеасаблівых курсах.
– Індывідуальна з намі працуюць куратары. Мы штомесяц запісваем урокі і адпраўляем ім для аналізу. Ёсць і метадыст, які таксама з намі супрацоўнічае. Ён дапамагае ўдасканаліць пэўныя элементы ўрока, указвае на тое, над чым трэба яшчэ падумаць. Кожны месяц удзельнікаў праекту падтрымліваюць фінансава стыпендыяй, таксама ўсе атрымалі для працы ноўтбукі, – падкрэслівае педагог. – Сваім вопытам з калегамі ўжо давялося падзяліцца ў Слонімскай гімназіі, Нясяцкай СШ, наперадзе – інтэнсіў у Прылукскай СШ.
Па ўмовах праграмы яе ўдзельнікі павінны рэалізоўваць адукацыйныя праекты. Вера Свідзерская свой праект звязала са школьнай радыё-медыястудыяй: па пятніцах вучні і настаўнікі слухаюць эфіры ў сценах школы, вядуцца старонкі ўстановы ў сацыяльных сетках. Дзякуючы гэтай працы выконваецца асноўная місія праграмы – усе вучні маюць магчымасць раскрыць свае здольнасці. Адны становяцца вядучымі, другія рыхтуюць інфармацыйны матэрыял, трэція манціруюць відэаролікі. Трэба адзначыць, што 150 вучняў школы запоўнілі анкеты, каб далучыцца да радыё-медыястудыі.
Вера Сяргееўна – адзін з тых настаўнікаў, якія разумеюць, што інтарэсы, погляды нашай моладзі мяняюцца, актыўна развіваюцца сродкі інфармацыі:
– Я проста абавязана быць у трэндзе, каб дзеці маглі паказаць свае лепшыя якасці. Упэўнілася яшчэ раз, што знаходжуся на сваім месцы, у патрэбны час і раблю сапраўды вялікую справу.
Уладзімір РОГАЎ.
