Асноўнай тэмай усіх мерапрыемстваў, запланаваных падчас экспедыцыі, стане «Дзень народнага адзінства».
Па словах кіраўніка экспедыцыі Аляксандра Лапата-Загорскага, яе дэвіз – выказванне Серафіма Раданежскага: «Адзінствам і любоўю ўратуемся» – асабліва актуальны сёлета, у Год народнага адзінства. Усталяванне згоды, узаемаразумення і ўзаемапавагі – адна з асноўных тэм выступленняў удзельнікаў на шматлікіх духоўна-асветніцкіх сустрэчах, якія праводзіліся на папярэдніх маршрутах і запланаваны ў раёнах, што будуць наведаны «Дарогай да святыняў – 2021».
Пачнецца Экспедыцыя традыцыйным малебнам аб вандроўніках у Мінскім Свята-Духавым кафедральным саборы. У паломнікаў – нязгасная лампада з Благадатным агнём ад Гроба Гасподняга і цудатворная Загор'е-Сталавіцкая ікона Пакрова Прасвятой Багародзіцы.
Падчас вандроўкі ўдзельнікі экспедыцыі – святары праваслаўнай царквы, вядомыя дзеячы навукі, культуры, мастацтва наведаюць бальніцы і адукацыйныя ўстановы, дзіцячыя дамы і інтэрнаты для пажылых людзей.
Добрай традыцыяй «Дарогі да святыняў» стала пасадка дрэў у месцах наведвання з сімвалічнай назвай – Сад Малітвы, які павінен стаць успамінам аб сустрэчы.
Завершыцца экспедыцыя 5 верасня у горадзе Капыль – сталіцы Дня беларускага пісьменства – святочнай службай у храме Узнясення Гасподня, перадачай Благадатнага агню на свечкi прыхаджан, сустрэчамі ўдзельнікаў экспедыцыі з жыхарамі Капыля.
