Мне пашчасціла там пабываць падчас нашага падарожжа ў Нясвіж. Скажу, што прадстаўлена вельмі цікавая экспазіцыя.

Міхаіл Сеўрук – майстар жывапісу і графікі. На выставе сабраны яго работы, выкананыя ў самых розных стылях. Большасцю гэта графічныя лісты ў тэхніках літаграфіі, лінагравюры, ксілаграфіі. Прадстаўлена цікавая графіка алоўкам. Ёсць жывапіс алеем, акварэллю і гуашшу. Усё гэта сведчыць пра рознабаковы талент мастака, яго уменне валодаць цэлай палітрай матэрыялаў.

Сэнсава ж у яго карцінах – цудоўны вобраз Беларусі тых часоў, вельмі дакладна перададзена іх атмасфера. Пераважна гэта пейзажі і партрэты. Назвы гавораць самі за сябе: «Лясная сцежка», «Вяргіні ў садзе», «Вясна ў Нясвіжы», «Партрэт пляменніка Сяргея», «Алея»… Нібы апынуліся ў творчым падарожжы ў часе і прасторы.

Мы даведаліся, што большасць карцін 1960-70-х прысвечана людзям калгаснай вёскі. І пацвярджэннем таму сталі экспанаты, каля якіх я затрымалася найбольш. Разам з карцінамі прадстаўлены вельмі цікавы дакумент. Гэта пасведчанне, выдадзенае праўленнем Саюза мастакоў Беларускай ССР 29 мая 1962 года. Вось яго тэкст: «Выдадзена члену Саюза мастакоў БССР мастаку Сеўруку Міхаілу Канстанцінавічу ў тым, што ён накіроўваецца ў калгасы Насвіжскага раёна Мінскай вобласці для збору матэрыялаў да выставы, прысвечанай перадавікам сельскай гаспадаркі, і напісання партрэтаў перадавых лю­дзей калгасаў. Праўленне Саюза мастакоў БССР просіць кіраўнікоў калгасаў аказваць т. Сеўруку М.К. усялякае са­дзейнічанне ў яго творчай рабоце. Старшыня Саюза мастакоў БССР В. Цвірка». Вось, аказваецца, якое значэнне надавалася творчай працы і як падкрэслівалася яе дзяржаўнае значэнне.

Выстава адметная не толькі цікавымі работамі, але і тым, што экспануюцца яны ўпершыню. Увогуле, мастак паходзіў з роду палескай шляхты, адукацыю атрымаў у інстытуце прыгожых мастацтваў Віленскага ўніверсітэта. А пасля Вялікай Айчыннай вайны жыў у Нясвіжы, выкладаў маляванне і чарчэнне ў школе, кіраваў мастацкай студыяй пры Доме культуры. Вось чаму яго так шануюць менавіта ў гэтым горадзе. Дарэчы, у Нясвіжы створана яго кватэра-музей, якая належыць да мясцовага гісторыка-краязнаўчага музея. А ў мінулым годзе ў фонд Палацавага ансамбля «Нясвіж» родныя мастака перадалі 50 яго работ, што і экспануюцца на выставе «Міхаіл Сеўрук. Дакрануцца да невядомага». І ўсе прыхільнікі мастацтва могуць гэта зрабіць.

Сафія БАРАДАЎКА.