Можна здабываць вадаплаўную (акрамя гусей) і балотную дзічыну, а таксама слонку, вяхіра, голуба шызага, перапёлку і фазана.У Барысаўскай міжраённай інспекцыі аховы жывёльнага і расліннага свету нагадалі, што паляванне дазволена ў светлы час сутак наступнымі спосабамі: з засады, з падыходу, з пад’езду з маламерных суднаў без рухавікоў або з выключанымі рухавікамі. Дазваляецца выкарыстоўваць гладкаствольную паляўнічую зброю і патроны са шротам, паляўнічых сабак усіх груп, акрамя ганчакоў і хартоў. Дапускаецца безружэйнае паляванне з лоўчымі птушкамі.
Таксама з другой суботы жніўня адкрылася паляванне на цецерука. Але паколькі гэты від нарміруецца, то яго здабыча вядзецца на падставе атрыманага ў паляўнічай гаспадарцы дазволу і паляўнічай пуцёўкі да яго. Паляваць можна толькі ў светлы час сутак на асобін любога полу і ўзросту, акрамя старак (самак, якія водзяць вывадак маладых птушак). Спосаб палявання – ружэйны з падыходу толькі з паляўнічымі сабакамі парод выжла, спаніэль, рэтрывер (з адным сабакам – да трох паляўнічых) з ужываннем гладкаствольнай паляўнічай зброі і патронаў са шротам.
З першай суботы верасня (5-е чысло) будзе дазволена здабываць рабчыка і шэрую курапатку, а з трэцяй суботы верасня (19-е чысло) – гусь белалобую, гуменніка, гусь шэрую і канадскую казарку.
