Раённым выканаўчым камітэтам зацверджаны план мерапрыемстваў па правядзенні месячніка па навядзенні парадку на зямлі, добраўпарадкаванні і азеляненні тэрыторый.Кіраўнікі раённых прадпрыемстваў, арганізацый і ўстаноў, старшыні сельскіх выканаўчых камітэтаў арганізоўваюць і праводзяць суботнікі з максімальна эфектыўным удзелам насельніцтва, вызначылі неабходныя аб’ёмы выканання работ, працоўныя і матэрыяльныя рэсурсы, адказных за арганізацыю работ па навядзенні парадку на замацаваных тэрыторыях прадпрыемстваў і арганізацый, тэрыторыях агульнага карыстання населеных пунктаў.
Падчас месячніка Крупскі лясгас, Крупскі ваенны лясгас, філіял КУП «Мінскаблдарбуд»-«ДРБУ № 164», філіял «ДЭУ № 69» РУП «Мінскаўтадар-Цэнтр» павінны правесці работы па ліквідацыі несанкцыянаваных звалак на землях ляснога фонду і ў кантралюемых зонах дарог, забяспечыўшы рэгулярныя ўборкі і вываз камунальных адходаў, буралому і сухастойных дрэў, знішчэнне сумніку канадскага.
Шмат работы і ў КУП «Жылцеплабуд». Гэта – і навядзенне парадку ў гарадскім парку, уборка пяску ўздоўж бардзюраў вуліц горада, грэйдзіраванне дарог і вуліц, прывядзенне ў парадак тэрыторый могілак у г. Крупкі і г.п. Халопенічы, пасадка дрэў на дваровых тэрыторыях па вул. Маскоўскай і Міру, уборка апалага лісця.
Літаральна ўсе сельскагаспадарчыя арганізацыі ў гэтыя дні наводзяць парадак на вытворчых аб’ектах, убіраюць падсобныя памяшканні, рамантуюць агароджванні малочнатаварных ферм, мехдвароў, мехмайстэрняў, збожжатокаў, займаюцца вывазкай арганікі на палеткі.
Работнікі заказніка рэспубліканскага значэння «Сялява» разам з Крупскай раённай інспекцыяй прыродных рэсурсаў і аховы навакольнага асяроддзя прыбіраюць тэрыторыі экалагічнай сцяжыны «Прошыцкія балоты», зоны адпачынку «Панская купальня», «Гузовіна», Дамы рыбака і паляўнічага ў вёсках Янаўшчына і Прошыка.
Вялікія задачы пастаўлены і перад сельскімі выканаўчымі камітэтамі. У прыватнасці, іх работнікамі высаджваюцца дрэвы і кусты ў населеных пунктах, убіраецца лісце на воінскіх пахаваннях, звалкі на грамадзянскіх могілках, скошваецца пустазелле, добраўпарадкоўваюцца тэрыторыі, праводзяцца дэмантаж і рамонт агароджаў, зносяцца непрыгодныя для пражывання дамы, спільваюцца старыя дрэвы і г.д.
Папрацуючы ў гэтыя дні ўсе разам, мы палепшым санітарны стан тэрыторый не толькі прадпрыемстваў і арганізацый, але і сваіх уласных падворкаў, тым самым унясем свой пасільны ўклад у навядзенне чысціні і парадку на зямлі.
