Напярэдадні жанчыны выпякалі гэтых птушак, а раніцай раздавалі дзецям, каб тыя з песнямі гукалі вясну, забягалі з імі на пагоркі і выкрыквалі жартаўлівае прывітанне.
У нашай «Алёнцы» да гэтага дня мы прапанавалі бацькам разам з дзеткамі зрабіць выставу «Птушкі маёй краіны». Гліняныя, саламяныя, драўляныя вырабы, цацкі, малюнкі – выстава атрымалася разнастайнай.
Следам за сакавіцкім звычаем набліжаюцца красавіцкія. 6 красавіка адзначаецца прыгожы абрад «Камаедзіца». Ён азначае перамогу сонейка і вясны. У гэты дзень будзілі мядзведзя і гатавалі асаблівую ежу. Варылі засушаны з лета «рэпнік» – бацвінне рэпы, а таксама кісель з аўса. А традыцыйная ежа на Камаедзіцу – камы. Гарох распарвалі ў печы, даводзілі да стану пюрэ, дабаўлялі муку і фармавалі камы, якія запякалі ў печы да з’яўлення скарынкі. Страва атрымлівалася смачнай і насычанай. Старажытныя славяне называлі мядзведзя Камам. Адсюль і выраз «першы блін камяком», гэта значыць мядзведзін. Каб лясны гаспадар не шкодзіў людзям і каб разам з ім абудзілася прырода, усёй сям’і трэба было легчы спаць і пакачацца з боку на бок на працягу двух гадзін. Пасля такой качаніны свята працягвалася, і камы разам з морквай, рэпай і яблыкамі адносілі ў лес. На наступны дзень – Дабравешчанне – мядзведзь прачынаецца і пакідае бярлогу. А разам з гэтым надыходзіць сапраўдная цёплая вясна.
Дзеці заўсёды з задавальненнем знаёмяцца з народнымі звычаямі і абрадамі. Падчас заняткаў яны гуляюць у беларускія гульні, спяваюць песні і чытаюць вершы на беларускай мове. Дарослыя і дзеці атрымліваюць галоўнае – настрой і жаданне шанаваць і любіць нашу родную Беларусь і такую мілагучную родную мову.
Вольга ЗМІТРАКОВІЧ, выхавальнік дзіцячага сада № 2 г. Крупкі. Фота аўтара.
