І тут успомнілася, як нам расказвалі – птушкай года 2024 года ў Беларусі названа шэрая варона. Што можа быць больш звыклага, чым гэта птушка? Чаму менавіта яна? Зачапіла мяне гэтая тэма, і я пачала вывучаць. Аказваецца, што пярнатая гераіня года здольна нас здзівіць. Мяне, напрыклад, вось чым.

Няхай у варон няма яркага пер’я і прыгожых спеваў, але яны вельмі разумныя птушкі, якія могуць пра­аналізаваць сітуацыю і нават праявіць кемлівасць. Уявіце сабе: калі вароне трапіць арэх у шкарлупцы, то яна можа альбо скінуць яго з вышыні на цвёрдае, каб разбіць, альбо пакласці на дарогу, дачакацца, пакуль праедзе машына і раздавіць яго, а затым спакойна з’есці!

Увогуле ж вароны ядуць усё: мяса, насякомых, чарвякоў, грызуноў, зерне, розныя адыходы і нават крадуць яйкі.

Даследчыкі сцвярджаюць, што вароны здольныя запамінаць людзей у твар і пазнаваць іх. І яшчэ цікавей: могуць памятаць непрыемныя сітуацыі, тых, хто іх пакрыўдзіў, і адпомсціць нават праз пэўны час.

Гэтыя птушкі маюць зносіны паміж сабой і нават сваю «мову». У ёй ёсць гукі, каб звяртацца да маладняка, для сваркі і агульнага збору, сігналы трывогі і бедства.

А яшчэ вароны ўмеюць лічыць. Апісваецца такі эксперымент. Вароне на выбар паставілі дзве кармушкі, у адну паклалі 14 жукоў, у другую – 15. Нават чалавеку цяжка адразу вызначыць, дзе больш, а вароны рабілі гэта лёгка.

А яшчэ вароны жывуць парамі, яны моцныя, на ўсё жыццё. Пасяляюцца на адным месцы і могуць шмат гадоў выкарыстоўваць адно гняздо. Дарэчы, сведчыцца, што ў сучасных варон у гняздзе ўладкаваны і сучасныя матэрыя­лы – гэта дрот. А часам каркас можа быць выраблены толькі з яго!

Выміранне гэтым птушкам не пагражае. Дык чаму ж на іх звернута такая ўвага? А таму, што адзінае, што ім пагражае, гэта чалавек… Вось яно як! Таму, каб зменшыць колькасць канфліктаў між чалавекам і шэрай варонай, грамадская арганізацыя «Ахова птушак бацькаўшчыны» і аб’явіла птушкай года-2024 менавіта яе.

Паназірайце за ёй. Гэта надзвычай цікава.

Сафія БАРАДАЎКА.