Пашчасціла пабываць на мерапрыемстве вучням школы № 1 г. Крупкі. Хлопцы і дзяўчаты пазнаёміліся з цікавай інфармацыяй пра паходжанне кніг, здзейснілі віртуальнае падарожжа па славутых месцах, успомнілі беларускіх асветнікаў. Ім была прысвечана тэматычная віктарына. Абмеркавалі і сучасныя дасягненні краіны. Пасля на выдатна справіліся з конкурсамі «Мой народ», «Як ты сэрцу міла, Беларусь».
– Нам вельмі падабаюцца квэсты, інтарактыўныя віктарыны і экскурсіі. У нашай бібліятэцы гэта магчыма. З класным кіраўніком часта тут бываем. Падабаецца, як праходзяць мерапрыемсты, прысвечаныя розным святам. У бібліятэцы для нас і першы ўрок у навучальным годзе быў арганізаваны, – адзначыла вучаніца шостага класа Елізавета Пляханава.
Зацікавіла прысутных кніжная выстава. На ёй прадстаўлена літаратура, якая дае магчымасць даведацца пра з’яўленне і развіццё беларускага кнігадрукавання, а таксама пра асветнікаў, дзяржаўных і рэлігійных дзеячаў, якія заклалі падмурак айчыннай адукацыі і пісьменства.Выстава абнаўляецца ў адпаведнасці са знакавай падзеяй: ужо прадумана напаўненне паліц да Дня народнага адзінства, раённых дажынак, Дня бібліятэк.
Калектыў раённай бібліятэкі таксама далучыўся да праекту «Чытаем па-беларуску». Быў падрыхтаваны відэаролік, дзе кожны супрацоўнік прачытаў радкі з верша паэткі Крупскага раёна Таісіі Шэдка «Бацькаўшчына». Да флэшмобу далучыліся чытачы з Каласоўскай і Крупскай сельскіх бібліятэк. Прыемна бачыць, як наша моладзь з захапленнем чытае вершаваныя радкі, а потым деліцца ўражаннямі з сябрамі. Тым больш відэа размяшчаецца ў сацыяльных сетках, а гэта – правільны выхаваўчы кантэнт.
Святалана Каляда, намеснік дырэктара бібліятэкі, лічыць, што такія мерапрыемствы садзейнічаюць папулярызацыі беларускай мовы, паказваюць непарушнае адзінства друкаванага слова і гісторыі народа.
Уладзімір РОГАЎ.
