– Задачы па навядзенні парадку на зямлі, я думаю, зразумелыя ўсім, работы шмат. І працаваць у гэтым накірунку якасна можна толькі разам. Упаўнаважаныя вёсак, дэпутаты, жыхары – раўнадушных тут не павінна быць. Але ж самі ведаеце, на набыццё штыкетніку, фарбы, брусоў, ды і тых жа цвікоў патрэбны грошы. І тут на выручку нам прыходзяць спонсары. Гэта – Дзяніс Петрыкаў, кіраўнік прыватнага прадпрыемства «ЛокФорестПлюс», Сяргей Шчаўроўскі  – «БОАНА», Сяргей Мазгоў – «Древовал», Андранік Лалаян – «Строитель села», Дзмітрый Глушчанка – кіраўнік філіяла сумеснага прадпрыемства «ММЦ» адкрытага акцыянернага таварыства «Крупская лесапільная вытворчасць». Менавіта яны – нашы надзейныя памочнікі ў вырашэнні многіх пытанняў, і мы вельмі ўдзячны Дзянісу Мікалаевічу, Сяргею Міхайлавічу, Сяргею Пятровічу, Андраніку Гургенавічу, Дзмітрыю Андрэевічу.

Дапамога з іх боку аказваецца і рабочай сілай, і тэхнікай. Да прыкладу, пры абуладкаванні агароджы ў пасёлку Крупскім Дзмітрый Глушчанка шматдзетным сем’ям, адзінокім людзям, пенсіянерам бясплатна выдзеліў брус, штакетнік, цвікі і фарбу. Скідка была зроблена і тым, хто выпісваў штакетнік у Крупскім ваенным лясгасе. Гэта ж прадпрыемства арганізоўвала суботнікі. Арыенціровачна было пастаўлена 1 350 пагонных метраў агароджы. І гэтым мы не абмежаваліся. Зноў жа прадстаўнікі ваеннага лясгаса, сацыяльныя работнікі і іншыя ўбіралі каля дамоў, дзе ніхто не пражывае, высякалі кусты, карацей кажучы, добраўпарадкоўвалі тэрыторыі.

Асобным пунктам стаіць навядзенне парадку на сельскіх могілках, якіх у нашым сельсавеце – 17. Пастаўлена новая агароджа на грамадзянскіх могілках вёсак Вялікая Слабада, Карпаўка, Маслёнка, хутара Маслёнка, цяпер вядзецца ўстаноўка агароджы, дзесьці 260 пагонных метраў, на могілках вёскі Шэйка. І зноў жа без спонсараў мы і тут не абышліся.

Шмат робіцца і ў плане рэалізацыі Указа Прэзідэнта Рэспублікі Беларусь ад 23.02.2012 г. № 100 «Аб мерах па ўдасканальванні ўліку і скарачэнні колькасці пустуючых і старых дамоў у сельскай мясцовасці». Згодна плана, нам трэба было знесці 2 пустуючыя дамы, на самой жа справе з пачатку года з прыцягненнем жыхароў знесена 9 непрыгодных для пражывання дамоў.

Навядзенне парадку на зямлі – непасрэдная работа тых людзей, якія жывуць на ёй. Улетку многія сваімі сіламі абкошваюць траву і пустазелле, упрыгожваюць свае сядзібы кветкамі, робяць клумбы, ставяць малыя архітэктурныя формы. Клапоцяцца аб добраўпарадкаванні нашы дэпутаты, старасты і проста актывісты. Да прыкладу, Наталля Рыгораўна Кулеш з Маслёнкі – член аглядавай камісіі, цесна ўзаемадзейнічае з намі. Актыўна ўдзельнічае ў жыцці вёскі Карпаўка яе стараста Анастасія Сцяпанаўна Рэкіс. Ніводнае пытанне, якое хвалюе вяскоўцаў, яна не пакідае без увагі. Наогул, у сельсавеце 28 населеных пунктаў і ў кожным з іх ёсць тыя, для якіх вёска – гэта менавіта малая радзіма, без якой яны сябе і не ўяўляюць.