Як і заўсёды, журналісты раённай газеты «Крупскі веснік» не прамінулі такой падзеі – яны наведалі паштовае аддзяленне сувязі Крупкі-1. І зноў даводзіцца канстатаваць, што многія з гараджан прымяркоўваюць наведванне аддзялення паштовай сувязі менавіта на гэты дзень. Мы ўжо неаднаразова пераконваліся ў тым, што і колькасць выпісаных экзэмпляраў раёнкі тады значна павялічваецца. Забягаючы наперад, адзначым, што так адбылося і на гэты раз.
На бачных месцах у горадзе загадзя былі вывешаны аб’явы аб тым, што 19 снежня адбудзецца абласны дзень падпісчыка. Змяшчаўся анонс аб гэтым і ў раённай газеце. І тыя крупчане, якія аддадзены сваёй газеце, прыйшлі ў аддзяленне сувязі Крупкі-1, каб зноў пацвердзіць свой выбар.
Словы ўдзячнасці ў адрас «Крупскага весніка» мы пачулі ад нашых верных падпісчыкаў Валянціны Грамянковай, Ганны Бабіцкай, Людмілы Валчок, Надзеі Жаланнай, Наталлі Кошалевай, Еўдакіі Майстрэнка, Зоі Небажак, Васіля Сергуна, Алы Закрэўскай, Марыі Кухлеўскай і многіх іншых.
– На Крупшчыну разам з мужам Аляксандрам Свірыдавічам мы прыехалі роўна 50 гадоў таму, – гаварыла падчас правядзення акцыі жыхарка горада Таццяна Вычанкова. – Працавалі ў калгасе «Бальшавік», у племсаўгасе «Слабада», на Халопеніцкім масласыраводзе. І ўвесь гэты час разам з намі была раённая газета. Нягледзячы на тое, што мяняліся назвы, яна заўсёды несла крупчанам даступную інфармацыю, расказвала аб падзеях, што адбываюцца ў раёне, аб людзях і іх справах. З настальгіяй успамінаем тыя гады, калі муж працаваў дырэктарам племсаўгаса «Слабада». Каб заахвоціць працаўнікоў сяла на яшчэ больш плённую працу, ён запрашаў у гаспадарку фотакарэспандэнта і журналіста, сам ездзіў з імі па населеных пунктах, фермах, брыгадах. А затым у раённай газеце змяшчаліся фотапартрэты і замалёўкі пра даярак, механізатараў, паляводаў. Цяпер мы жывем у Крупках і выкарыстоўваем магчымасць адразу рабіць падпіску на паўгода. Тады і бонус атрымліваеш – бясплатную падпіску на адзін месяц, а яшчэ і розныя сувеніры з лагатыпам «Крупскі веснік».
І такіх выказванняў было шмат. Да прыкладу, Тамара Асіповіч адзначала, што ў раённай газеце неаднаразова змяшчаліся замалёўкі пра яе, пісала артыкулы ў газету і яна сама, усе выразкі захоўвае ў спецыяльным альбоме. А вось што сказаў Іван Маеўскі: «Мясцовая газета – настольная газета ў нашай сям’і. Чытаем яе з задавальненнем, чакаем кожны нумар. Асабіста ведаю ўвесь калектыў рэдакцыі, жадаю журналістам творчых знаходак, вострага пяра і новых удзячных чытачоў».
Пагадзіцеся, прыемна было чуць такія словы. Нагадваем яшчэ раз, што падпіска на газеты і часопісы на першае паўгоддзе закончыцца на наступным тыдні. Паспяшайцеся ў паштовыя аддзяленні, звяртайцеся да начальнікаў перасоўных аддзяленняў паштовай сувязі, да паштальёнаў, а таксама ў рэдакцыю раённай газеты да грамадскага распаўсюджвальніка. Мяркуем, што і абанемент на «Крупскі веснік», які вы выпішыце сабе, сваім родным і сябрам, стане падарункам на Новы год.
