Беларускі рэспубліканскі саюз моладзі і Міністэрства прыродных рэсурсаў і аховы навакольнага асяроддзя аб’явілі пра старт штогадовага рэспубліканскага конкурсу «Моладзь за чысціню гарадоў і вёсак».
У маі – верасні валанцёрскія атрады запрашаюць прыняць удзел у добраўпарадкаванні тэрыторый населеных пунктаў і навядзенні парадку на зямлі. Конкурс накіраваны, у першую чаргу, на прыцягненне маладых людзей да ўдзелу ў мерапрыемствах па добраўпарадкаванні помнікаў воінскай славы, месцаў масавых пахаванняў, паркаў, аб’ектаў культурна-гістарычнай і духоўнай спадчыны, водаахоўных зон і прыбярэжных палос водных аб’ектаў.
Праходзіць конкурс у тры этапы – раённы, абласны, рэспубліканскі – у наступных намінацыях: «Найлепшы валанцёрскі атрад сярод навучэнскай моладзі», «Найлепшы валанцёрскі атрад сярод студэнцкай моладзі», «Найлепшы валанцёрскі атрад сярод працоўнай моладзі», «Найлепшы валанцёр атрада» і «Найлепшая ландшафтная кампазіцыя».
Створаны арганізацыйны камітэт вызначыць пераможцаў конкурсу. Падчас падвядзення вынікаў будуць улічвацца колькасць праведзеных мерапрыемстваў, іх масавасць і сацыяльная значнасць для рэгіёна, экалагічная эфектыўнасць і іншыя фактары. Пры вызначэнні пераможцаў у намінацыі «Найлепшая ландшафтная кампазіцыя» будзе брацца пад увагу арыгінальнасць планіроўкі ладшафтнай кампазіцыі і разнастайнасць матэрыялу, выкарыстанага для яе стварэння.
Варта зазначыць, што прызавы фонд рэспубліканскага этапу конкурсу складае ў гэтым годзе 44 мільёны рублёў. Так што, дзейнічайце, маладыя!
