Аўтарамі творчага праекта з'яўляюцца Кацярына і Міхась Аракчэевы. Фотамастакі, дызайнеры, выпускнікі Беларускай акадэміі мастацтваў. З 1998 г. працуюць над фотапраектамі супольна. З цягам часу тандэм пераўтварыўся ў некамерцыйную арт-студыю "PILIGRYM". Асноўным накірункам творчасці з'яўляецца стварэнне партрэтных фотасерый з адмысловым тэматычным складнікам, агучванне мастацкай канцэпцыі праз фотаэксперыменты з пастановачнымі сюжэтамі.

Праходзяць гады - з'яўляюцца і сыходзяць людскія пакаленні. Плынь часу знясла б і радасць, і смутак, і ўспаміны, калі б не было побач людзей, якія нагадваюць адкуль пайшлі мы ўсе. Так ідзе няспынная пераемнасць пакаленняў. Серыя фотапартрэтаў "Людзі адной зямлі" - спроба адлюстраваць гэты адвечны рух. Каляровыя фотавыявы экспанаваліся раней як "Нашы людзі" і з'яўляюцца асобным праектам - серыяй партрэтаў сябраў Студэнцкага этнаграфічнага таварыства, асноўнай дзейнасцю якога з'яўляецца менавіта пераемнасць, захаванне і аднаўленне беларускай народнай культуры. Манахромныя партрэты людзей сталага ўзросту былі створаны ў этнаграфічных экспедыцыях па ўсёй Беларусі.

У адкрыцці выставы будзе браць удзел наша частая госця, таленавітая мастачка Аксана Аракчэева. На вернісажы аматараў  выяўленчага мастацтва чакае сюрпрыз - упершыню ў Крупках выступіць гурт "ASTROUNA", які будзе спяваць аўтэнтычныя беларускія песні.

Запрашаем усіх акунуцца ў свет роднай беларускай культуры!

Хрысціна Жукава, навуковы супрацоўнік.