Чалавечае ўмяшальніцтва ў птушыны лёс спатрэбілася невыпадкова. У ліпені бягучага года на аўтадарозе паблізу вёскі Язбы невядомы аўтамабіль, які ехаў з вялікай хуткасцю, наехаў на лебедзяў – самца і двух птушанят. Яны загінулі пад коламі. Як вынік, на вадаёме засталася самка і пяцёра іх дзетак. 
Усім нам вядома, што ў прыродзе выжывае мацнейшы. Так надарылася і на гэты раз. У хуткім часе на возера прыляцела пара чужынцаў, якія сталі выжываць няпоўнае сямейства лебедзяў з аблюбаванага кутка. І ім не стала месца на вадзе, таму даводзілася туліцца ў прыбярэжным чароце. Пабачыўшы такую сітуацыю, прадстаўнікі Крупскай раённай інспекцыі прыродных рэсурсаў і аховы навакольнага асяроддзя, егерская служба заказніка рэспубліканскага значэння «Сялява» вырашылі перасяліць сям’ю лебедзяў у іншае месца, і такім чынам выратаваць іх ад чужынцаў. Дарослым дапамагалі вучні Худавецкай школы, якія жывуць у Язбах, Дубах і Калодніцы. Рабяты з радасцю прынялі гэту прапанову і ўзялі самы актыўны ўдзел у выратаванні лебядзінай сям’і. Сведчанне таму – шматлікія фотаздымкі, зробленыя падчас дабрачыннай акцыі.
І зараз птушкі абжываюцца на новым бяспечным для іх месцы.
…Пагадзіцеся, прыгажосць лебедзяў нікога не пакідае абыякавым. І чым бы ты не быў заняты падчас адпачынку на возеры, але калі ўбачыш, як лебедзі павольна плывуць па ціхай і спакойнай воднай гладзі Сялявы, позірк міжволі скіроўваецца толькі на іх. Упэўнена, што ў многіх крупчан і нашых гасцей захоўваецца шмат фотаздымкаў, на якіх дружная лебядзіная сям’я плыве ўздоўж берага, не баючыся людзей. І добра, што людзі гатовыя не толькі захапляцца, але і дапамагчы птушкам у цяжкую для іх часіну.
