На сустрэчу прыйшлі вучні раённай гімназіі. Навуковы супрацоўнік галерэі Хрысціна Жукава распавяла пра творчасць і жыццё пісьменніцы. Тамара Бунта прэзентавала свае кнігі. Апавяданні напісаны жывой мовай, яны сумныя і вясёлыя, у многім аўтабіяграфічныя. Дарэчы сказаць, кніга Тамары Пятроўны «Дзяўчынка з Вішнёвага завулка» перамагла ў літаратурным конкурсе Саюза пісьменнікаў Беларусі ў намінацыі «Дзіцячая літаратура».

Як адзначыла Хрысціна Жукава, творы пісьменніцы дзеці прымаюць блізка да сэрца, бо піша яна пра сваё маленства, пра дзіцячыя перажыванні і ўспрыманне акаляючага свету. І гэта сапраўды так. Зборнік «Чароўны кошык» склалі пятнаццаць душэўных апавяданняў, героямі якіх з’яўляюцца сучасныя дзеці з іх радасцямі і крыўдамі, перамогамі і расчараваннямі, пошукамі і стратамі. Аўтар дасціпна, яскрава, часта з гумарам апісвае розныя сітуацыі, якія здараюцца з дзецьмі ў школе і ў вольны час. У гэтых сітуацыях, часам няпростых, хлопчыкі і дзяўчынкі праходзяць свае пе­ршыя жыццёвыя выпрабаванні і пачынаюць разумець, што такое блізкія людзі, сапраўднае сяброўства, цудоўная музыка, любімыя кнігі, родная прырода і як важна ўсё гэта берагчы.

– У маіх апавяданнях няма фантастыкі, там дзейнічаюць звычайныя хлопчыкі і дзяўчынкі, іх бацькі, бабулі і дзядулі, настаўнікі, суседзі… Ну, хіба што не заўсёды ў рэальным жыцці ёсць столькі святла, дабрыні і разумення. Таму, напэўна, і патрэбныя кнігі, якія падказваюць, якія ўчынкі добрыя, а якія не трэба рабіць, – адзначыла Тамара Бунта.

У 2024 годзе выйшла ў свет кніга «Далонькі з пушынкамі». Гэта пятнаццаць кароткіх гісторый з дынамічным, захапляльным сюжэтам, у якіх аўтар дасціпна, яскрава, часта з гумарам, апісвае розныя сітуацыі, якія здараюцца з дзецьмі. Дарэчы, ілюстрацыі да кніг зрабіла мастачка Аксана Аракчэева. Яна таксама прысутнічала на прэзентацыі. Кнігі вельмі зацікавілі дзяцей. Яны такія рознакаляровыя.

Сустрэча праходзіла цікава і пазнавальна. Госця праверыла вучняў на кемлівасць з дапамогай мудрагелістых загадак пра хатніх жывёл і прыроду. Дзеці адказна падрыхтаваліся да сустрэчы: чыталі цікавыя апавяданні і здзіўлялі госцю сваімі ведамі пра беларускіх пісьменнікаў. Янка Купала, Якуб Колас, Максім Багдановіч і іншых наперабой называлі дзяўчынкі і хлопчыкі. Самыя актыўныя атрымлівалі падаруначкі.

Кнігі разлічаны для дзяцей малодшага школьнага ўзросту. Але цікава будзе і дарослым. Апавяданні Тамары Бунты раўнадушнымі нікога не пакінуць.