З гэтай нагоды адбыўся гранд-канцэрт, дзе студэнты і выкладчыкі прадэманстравалі самыя бліскучыя грані свайго таленту. Грандыёзная юбілейная праграма прайшла ў цэнтры сталіцы ў ДК чыгуначнікаў. Сярод ганаровых гасцей – член Саюза пісьменнікаў Беларусі Барыс Макарэвіч, аўтар слоў да песні «Мастацтва чароўная сіла», што стала гімнам каледжа.
Рэжысёр-пастаноўшчык канцэрта Наталля Закервашэвіч адзначыла, што ўся сюжэтная лінія канцэрта вялася менавіта да гімна. Задума была ў тым, каб гімн нібы нараджаўся ў працэсе самога канцэрта.
Мы сустрэліся з Барысам і распыталі пра ўражанні і пра тое, як вялася праца над творам.
– Канцэрт быў сапраўды маштабны, – рассказаў ён. – Прайшоў нібы на ўзнёслых крылах творчасці. Справа ў тым, што каледж зараз навучае эстрадзе, народным і харавым спевам, харэаграфіі, дэкаратыўна-прыкладной творчасці, і гэта далёка не ўсё. Таму, зразумела, было што паказаць. Вельмі ганарова, што мне давялося стаць аўтарам слоў гімна, да якіх музыку напісала вядомы беларускі кампазітар, старшыня Саюза кампазітараў Беларусі Алена Атрашкевіч. Мы ўжо даўно знаходзімся ў супрацоўніцтве, таму працаваць было досыць лёгка. Хаця гімн – жанр вельмі спецыфічны, са сваімі патрабаваннямі як да тэксту, так і да музыкі. У тэксце гаворыцца пра натхненне, яскравыя фарбы мастацтва, скарбонку мудрых ведаў, пра тое, што самае лепшае і прыгожае жыве ў нашым народзе. Галоўны сэнс – мастацтва валодае чароўнай сілай, якая вядзе чалавека да самага лепшага і светлага. Творчы працэс доўжыўся каля трох месяцаў: напісанне слоў, музыкі, аранжыроўка. Працавала цэлая група. І вось наш твор прагучаў падчас юбілейнай імпрэзы.
Трэба адзначыць, што каледж выпускае вельмі кваліфікаваных прафесіяналаў. Ён шмат удзельнічае і перамагае ў разнастайных конкурсах, у тым ліку міжнароднага значэння. А напрыканцы мінулага года навучальная ўстанова ўдастоена спецыяльнай прэміі Прэзідэнта Рэспублікі Беларусь дзеячам культуры і мастацтва.
Сафія БАРАДАЎКА.
Фота прадастаўлена Барысам МАКАРЭВІЧАМ.
