На старонках гісторыі Крупшчыны мы знойдзем нямала імён, якімі ганарыцца наш народ, якія сваімі справамі ўзбагацілі духоўную ці матэрыяльную скарбонку нашай малой радзімы. І адным з такіх людзей з’яўляецца Аляксей Іванавіч Гамін.60 гадоў таму назад, у 1956 годзе, лёс звязаў ураджэнца Саратаўскай вобласці з Крупскім раёнам. Больш як паўстагоддзя тут развіваўся талент Аляксея Гаміна, удасканальвалася яго майстэрства, і, нарэшце, была сфарміравана творчая індывідуальнасць самадзейнага мастака.
Аляксей Іванавіч Гамін пайшоў у Вечнасць у 2010 годзе, пакінуўшы значны след у культурным жыцці не толькі Крупшчыны, але і за яе межамі. Майстар палітры вядомы як актыўны ўдзельнік рэспубліканскіх і ўсесаюзных выстаў народнай творчасці. Яго работа «Лён – наша багацце», адзначаная прэміяй Міністэрства культуры БССР, экспанавалася ў Германскай Дэмакратычнай Рэспубліцы на выставе народнай творчасці, прысвечанай Дням культуры Мінскай вобласці ў Патсдамскай акрузе. З нагоды 60-годдзя з часу сустрэчы Аляксея Гаміна з Крупшчынай, у памяць аб майстры сваёй справы ў Крупскай мастацкай галерэі імя Барыса Аракчэева адкрыта выстава «Крыніцы натхнення».
Лаўрэат Першага Усесаюзнага фестывалю самадзейнай мастацкай творчасці працоўных Аляксей Іванавіч быў шчодрым чалавекам. У гонар дружбы народаў усяго свету ён перадаў 20 карцін у дар ЗША, столькі ж – у Германію, 15 – у Канаду, 40 яго работ былі перададзены абласному аддзяленню Фонда культуры. Сёння работы Аляксея Гаміна захоўваюцца ў розных установах культуры, адукацыі і аховы здароўя Крупшчыны.
У галерэі экспануюцца 17 работ пейзажнага і партрэтнага жанраў. Сярод крыніц творчага натхнення і мастацкай фантазіі Аляксея Гаміна рака Волга, на берагах якой прайшло дзяцінства будучага майстра палітры і таямніцы якой адкрываліся маладому матарысту буксіра, рака Нача і возера Сялява, а таксама маляўнічыя куточкі крупскіх лясоў і палёў, часам з такімі незвычайнымі аб’ектамі гамінаўскай увагі, як камяні-валуны. Сіне-зялёная гама, насычаная цёплымі танамі, стварае лірычны настрой. Узіраешся ў работы нашага мастака-земляка і разумееш, што малюнкі прыроды тут напоўнены філасофскім сэнсам, нясуць важныя абагульненні пра жыццё чалавека, звязаны з яго працай. У такіх пейзажных замалёўках, як «Захад сонца на Волзе», «Дуб і рабіна», «Рака Нача», «Вечар», «Лён цвіце», «Радзіца вясной», чуецца музыка сэрца мастака, раскрываюцца яго душэўныя перажыванні і думы.
На выставе «Крыніцы натхнення» прадстаўлен Аляксей Гамін і як партрэтыст. Экспануюцца «Аўтапартрэт» і «Партрэт Чапаева».
Ажылі выстаўленыя работы самадзейнага мастака. Яны ў чаканні гледачоў. Выстава «Крыніцы натхнення» будзе доўжыцца да канца лютага бягучага года. Наведайце Крупскую мастацкую галерэю імя Барыса Аракчэева, і няхай сустрэча з мастацтвам Аляксея Гаміна стане данінай памяці пра чалавека, які ведаў, у чым сэнс яго жыцця.
Таццяна БОНДАР, навуковы супрацоўнік Крупскай мастацкай галерэі імя Барыса Аракчэева.
