Справаздачна-выбарная канферэнцыя ветэранаў-педагогаў падвяла вынікі работы за прайшоўшыя амаль пяць гадоў і намеціла перспектыву сваіх далейшых дзеянняў.На пачатку справаздачы старшыня раённага савета ветэранаў працы сістэмы адукацыі Валянціна Скваркоўская расказала аб якасным і колькасным складзе раённай ветэранскай арганізацыі педагогаў «Аптыміст», аб асноўных формах работы з ветэранамі. Гэта – выкарыстанне ўнікальнага педагагічнага вопыту праз настаўніцтва; прыцягненне ветэранаў у актыўнае жыццё праз удзел ва ўсіх масавых мерапрыемствах, праводзімых у раёне і ва ўстановах адукацыі; арганізацыя вольнага часу пажылых людзей праз работу клубаў па інтарэсах, створаных на базе РЦК і ТЦСАН; сустрэчы з ветэранамі педагагічнай працы; ушанаванне педагогаў-ветэранаў у сувязі з юбілейнымі датамі.
– Формы і метады работы з ветэранамі ва ўсіх звеннях разнастайныя і шматлікія, – працягвала Валянціна Іванаўна. – Хочацца адзначыць станоўчы вопыт у сярэдняй школе № 1, раённай гімназіі, Халопеніцкай, Хацюхоўскай і Ігрушкаўскай сярэдніх школах. Прафсаюзныя актывісты разам з вучнямі праводзяць працоўныя дэсанты па прывядзенні ў парадак падвор’яў, дзе жывуць ветэраны, ва ўборцы ўраджаю, ачыстцы снегу і іншых работах. Запрашэнні на апошні і першы званкі, ушанаванне юбіляраў, асабліва ў дзень выхаду на заслужаны адпачынак, запрашэнні на школьныя святы – гэта кранальна і важна для ветэранаў. Часам элементарнае «дзякуй» за працу і сціплы букет кветак ад дзетак або калег заменяць ветэрану самыя дарагія падарункі.
Калі размова зайшла аб найбольш паспяховых і цікавых мерапрыемствах арганізацыі, былі адзначаны перадсвяточная сустрэча «Некалі старэць настаўнікам», праведзеная на базе Крупскай раённай гімназіі, наведванне драматычнага тэатра імя Я. Купалы, старажытнага Полацка, раённыя мерапрыемствы, прысвечаныя Дню настаўніка, 8-га Сакавіка. Педагогі-ветэраны прынялі самы непасрэдны ўдзел у марафоне-конкурсе «Серебряная нить», прысвечанаму 70-годдзю Вялікай Перамогі. У яго рамках прайшла сустрэча з ветэранамі педагагічнай працы трох устаноў адукацыі «Бывших учителей не бывает». Першая сустрэча – СШ пасёлка Крупскі ля мемарыяльнай дошкі выпускніку школы, воіну-інтэрнацыяналісту Уладзіміру Крыштопенку, наведванне школьнага музея. Другі прыпынак – Ігрушкаўская СШ, знаёмства з экспанатамі гісторыка-краязнаўчага музея. Трэці прыпынак – Халопеніцкая СШ, наведванне музея гісторыі школы, канцэрт «Сустрэча пакаленняў». Вельмі ўразілі ветэранаў цікавыя экскурсіі пры наведванні мемарыяльнага комплексу «Курган славы» і Дзяржаўнага музея гісторыі Вялікай Айчыннай вайны. Незабыўнае ўражанне ва ўсіх пакінула і Нацыянальная бібліятэка Беларусі.
На рахунку раённага савета педагогаў-ветэранаў шмат добрых ініцыятыў. У прыватнасці, яны далучыліся да рэспубліканскай акцыі «Нашы дзеці», у год 70-годдзя Вялікай Перамогі прынялі ўдзел у акцыі «Ветэран ветэрану» – былі прыгожа аформлены і ўручаны чатыры пасылкі ўдзельнікам вайны: Аляксандры Фамінічне Марозавай, Мальвіне Іванаўне Гармазінскай, Тамары Міхайлаўне Хадасевіч і Уладзіміру Аляксандравічу Шынкевічу. Не застаўся ўбаку раённы савет і ад яшчэ аднаго папулярнага руху. Валанцёрскі атрад «Надзея» падтрымлівае цесныя сувязі з адзінокімі педагогамі-ветэранамі, дапамагае ім добрым словам і канкрэтнай справай. За дасягнутыя поспехі ў галіне адукацыі раённым саветам у кнігу «Кто есть кто-2015» занесены прозвішчы шасці педагогаў-ветэранаў.
– Вядомы рускі пісьменнік Антон Чэхаў у свой час заўважыў: «У мяне ёсць у жыцці такія хвіліны, за якія я б аддаў гадзіны, дні, месяцы», – сказала Валянціна Скваркоўская. – З вышыні пражытых гадоў хачу сказаць, што за час, праведзены разам з тымі, каго аб’ядноўвае вялікае званне ветэран, тым больш педагог-ветэран, незалежна ад узросту і раней займаемай пасады, сапраўды можна аддаць гадзіны, тыдні, месяцы. Гэта сустрэча з людзьмі вялікага сэрца і шчодрай душы, з вамі, паважаныя ветэраны.
На канферэнцыі выбран новы склад раённага савета педагогаў-ветэранаў. Яго старшынёй зноў абрана Валянціна Скваркоўская. Пасля афіцыйнай часткі ветэраны змаглі адпачыць, паглядзеўшы канцэрт мастацкай самадзейнасці, які быў дадзены сіламі гурткоўцаў Цэнтра дзіцячай творчасці, а таксама паглядзець відэафільм «Мы – аптымісты», змест якога адлюстроўваў дзейнасць ветэранскай арганізацыі педагогаў.
