– Можна ўбачыць і рэдкія экзэмпляры царкоўных кніг сярэдзіны XIX – пачатку XX стагоддзяў, якія раскрываюць духоўны свет нашых продкаў, сведчаць пра багатую традыцыю рэлігійнай літаратуры ў Беларусі. Акрамя таго, экспануюцца навуковыя даследчыя выданні, прысвечаныя дзейнасці і спадчыне славутага гуманіста, – адзначае навуковы супрацоўнік мастацкай галерэі Хрысціна Жукава.
Надрукаванае ў 1525 годзе віленскае выданне «Книга деяния и послания апостольская, завемая Апостал» – адзіная з кніг Скарыны без гравюрных ілюстрацый, хаця ў ёй выкарыстаны шматлікія застаўкі і канцоўкі, гравіраваныя ініцыялы. Да кожнай самастойнай часткі асветнік напісаў 22 прадмовы і 17 пасляслоўяў. Усяму тэксту папярэднічае агульная прадмова Францыска Скарыны. Каштоўнасць «Апостала» ў тым, што гэта выданне на царкоўнаславянскай мове беларускай рэдакцыі мела сувязь з традыцыямі беларускай і ўсходнеславянскай кніжнасці.
Выставу ўжо наведалі вучні ўстаноў адукацыі.
А вось у рамках краязнаўчага аб’яднання «Адраджэнне» ў СШ № 1 г. Крупкі ў шосты школьны дзень адбылася незвычайная сустрэча з мінулым. Хрысціна Жукава правяла інтэрактыўны занятак пад назвай «Скарынаўскае падарожжа». Гэта сустрэча стала своеасаблівай экскурсіяй у часы першадрукара. Вучні адчулі блізкасць да гісторыі, убачылі, як выглядалі кнігі шмат стагоддзяў таму.
Пасля гэтага навучэнцы ўзяліся за творчасць: з дапамогай алфавіту на пластыліне «друкавалі» словы і стваралі літары, натхнёныя выданнямі.
Акунуцца ў свет беларускай кніжнай культуры, глыбей зразумець значэнне творчай дзейнасці Францыска Скарыны ў галерэі можна да канца снежня.
Уладзімір РОГАЎ. Фота СШ № 1 г. Крупкі.
