Непасрэдна 18 мая ў Крупскім гісторыка-краязнаўчым музеі адбылася ўрачыстасць, прысвечаная Міжнароднаму дню музеяў. Падчас яе адкрыцця дырэктар культустановы Тамара Бальбот павіншавала прысутных з гэтай датай, нагадала заснавальніка Крупскага гісторыка-краязнаўчага музея Таццяну Якаўлеўну Белую, зазначыла, што дзясяткі тысяч экспанатаў – гэта вялікая праца ўсіх тых, хто іх збіраў, падкрэсліла, што крупчанам ёсць чым ганарыцца, ёсць што паказаць. – Сейчас практычна немагчыма ўявіць сабе жыццё ў сучасным грамадстве без існавання музеяў, – гаварыла навуковы супрацоўнік музея Ала Сасіна. – Яны сталі неад’емнай часткай нашага жыцця і культурнай спадчыны чалавецтва. Таму нядзіўна, што быў уведзены Міжнародны дзень музеяў, каб на сусветным узроўні адзначыць іх значнасць для чалавецтва. Акрамя таго, гэта свята было створана і для таго, каб прыцягнуць яшчэ большую колькасць людзей у музеі.
Тут жа было заўважана, што ў гэты дзень усіх наведвальнікаў чакае разнастайная і насычаная праграма. Кожны жадаючы можа наведаць музей і пазнаёміцца з цікавымі калекцыямі, выставамі, экспазіцыямі, паўдзельнічаць у майстар-класе беларускіх народных танцаў. І, да месца сказаць, што такой прапановай скарысталіся многія і многія. Дапамагла, бясспрэчна, і дадзеная ў раённай газеце анонсам праграма правядзення свята ў раённым музеі.
З раніцы, нягледзячы на пахмурнае надвор’е, у музей ішлі і ішлі наведвальнікі розных узростаў. І тут было што паглядзець! Калекцыянеры раённага аматарскага клуба «Скарбонка» прадстаўлялі свае незвычайныя ўнікальныя экспанаты. У прыватнасці, Валерый Чэус расказаў пра выстаўленыя спартыўную сімволіку і ўзнагароды, Аляксандр Фясько – пра калекцыю манет розных эпох, Андрэй Аляхновіч – пра старадаўнія кнігі, Уладзімір Меранцаў – пра сувенірныя запалкі, Віктар Успенскі – пра запальніцы і попельніцы краін свету, Аляксандр Будзько – пра геральдыку, Юрый Дудко – пра савецкія і расійскія аўтамабілі.
На працягу дня жыхары горада і яго госці знаёміліся з экспазіцыямі і выставамі ў музеі і мастацкай галерэі. Так, у выставачным зале музея ў той дзень была адкрыта выстава Сяргея Пыжыкава «Ощущения». Варта сказаць, што ўсе былі проста ўражаны карцінамі з лаканічнымі назвамі «Комета», «Гея», «Водоворот», «Вулкан», «Новолуние», «Высота», «Простор», «Сумерки» і іншымі. Не зачыняліся дзверы і ў мастацкай галерэі. Крупчане ахвотна знаёміліся з выставай «Родная старонка», прысвечанай 90-годдзю з дня нараджэння беларускага мастака Барыса Аракчэева.
Вечарам супрацоўнікі музея спачатку былі занепакоены дажджом, што пачаўся раптоўна і змог бы сарваць правядзенне танцавальнай вечарынкі. Але не! Госці – а гэта Антаніна Малама, Стас Асадчы, Мікалай Стрыгельскі, Ірына Гаварэнь, Алена Прохарава і баяніст Уладзімір Ганчароў – прыехалі ў вызначаны тэрмін, а сапраўдныя аматары народных танцаў не спалохаліся непагоды і дружна, з добрым настроем сабраліся ў дворыку музея. Загучалі акорды баяна, пад якія былі развучаны народныя танцы – «Лявоніха», «Бульба», полька, кракавяк, вальс, падэспань… Вечар удаўся на славу. Удзельнікі і госці засталіся задаволенымі і пажадалі надалей праводзіць такія народныя вечарынкі.
