Наступіла доўгачаканае цяпло, а з ім і любімы многімі адпачынак у зялёных зонах і каля вадаёмаў. Пра што варта памятаць, адпраўляючыся на прыроду, расказвае спецыяліст Крупскай раённай інспекцыі прыродных рэсурсаў і аховы навакольнага асяроддзя Алеся СНЫТКО:– Сёння хочацца пагаварыць аб прыродаахоўным заканадаўстве. Часцей за ўсё нядбайныя адпачываючыя трапляюцца на развядзенні вогнішчаў у забароненых месцах. Згодна артыкула 15.58 КаАП, за гэта парушэнне пагражае папярэджанне або штраф да 12-ці базавых велічынь.
Напамінаем, што размяшчаць іх можна на адлегласці не менш за 10 метраў ад будынкаў, 20 метраў ад лясных масіваў і 30 метраў ад стагоў сена і саломы. Мангал, барбекю, або аналагічнае прыстасаванне павінны стаяць мінімум у чатырох метрах ад збудаванняў. У пажаранебяспечны сезон забараняецца разводзіць вогнішчы ў месцах з падсохлай травой, на ўчастках пашкоджанага лесу.
Яшчэ адна глабальная праблема масавага адпачынку – смецце. Забруджванне вод цягне за сабой папярэджанне або накладанне штрафу ў памеры да 20-ці базавых велічынь (арт. 15.51 КаАП), лесу і іншай драўнінна-хмызняковай расліннасці – ад папярэджання да штрафу ў 20 базавых велічынь (арт. 15.30 КаАП). А вось за парушэнне заканадаўства аб абыходжанні з адходамі (арт. 15.63 КаАП) застацца толькі з папярэджаннем не атрымаецца: штраф складзе ад 5-ці да 50-ці базавых велічынь. Усё гэта датычыцца фізічных асоб. Калі ж за падобнай справай будзе затрыманы індывідуальны прадпрымальнік або юрыдычная асоба, пакаранне будзе ў разы больш строгім.
Некалькі слоў пра несанкцыянаваную стаянку падчас адпачынку. Стаянка бліжэй чым за 30 метраў ад берагавой лініі – недапушчальная: адказнасць – штраф памерам да 10-ці базавых велічынь.
І калі вы будзе выконваць усе гэтыя немудрагелістыя патрабаванні, то ваш спакойны адпачынак на возеры ці ў лесе – гарантаваны.
