Адразу заўважу, што за дзень мы паспелі пабываць у трох розных месцах, і ўсюды нас прымалі вельмі гасцінна. Адразу мы прыехалі ў дзіцячы рэабілітацыйна-аздараўленчы цэнтр «Надзея», які размя-шчаецца каля Вілейскага вадасховішча. Тут для нас была праведзена экскурсія. Падчас яе мы даведаліся, з якой мэтай быў пабудаваны гэты цэнтр і чаму менавіта ў гэтым месцы. Усім вядома, што 26 красавіка 1986 года на Чарнобыльскай атамнай электрастанцыі адбылася катастрофа, у выніку якой пацярпелі многія раёны нашай краіны. Таму і было вырашана стварыць цэнтр для аздараўлення дзяцей і падлеткаў, якія пацярпелі ад наступстваў катастрофы. Цяпер гэты цэнтр супрацоўнічае з многімі краінамі свету.

Далей наша экскурсія працягнулася ў дзіцячым аздараўленчым лагеры «Зубронак», дзе нас таксама вельмі цёпла сустрэлі і расказалі шмат чаго цікавага. Да спадобы ўсім нам прыйшоўся міні-заапарк гэтага лагера. Валанцёры прадэманстравалі доследы, расказалі, якія мерапрыемствы праводзяцца для дзяцей, каб звярнуць іх увагу на захаванне прыроды нашай роднай зямлі. Пасля нас пачаставалі ласункамі, уручылі сувеніры і далі магчымасць загадаць жаданне, запусціўшы ў неба паветраныя шары.

А заключная частка форуму праходзіла ў горадзе Мядзель. І менавіта тут нас чакаў прыемны сюрпрыз. На адкрытай пляцоўцы, што размясцілася на беразе возера Нарач, сабраліся ўсе ўдзельнікі эколага-патрыятычнага форуму, прысвечанага 100-годдзю Кастрычніцкай рэвалюцыі і Году навукі. Тут для нас была прадстаўлена канцэртная праграма, а таксама прайшла цырымонія ўзнагароджвання. І стала вялікай нечаканасцю, калі нас запрасілі на сцэну, уручылі сувеніры, а нашаму раённаму эколага-патрыятычнаму клубу «Спадчына» – дыплом Мінскай абласной арганізацыі Беларускага прафесійнага саюза работнікаў адукацыі і навукі за актыўны ўдзел у трэцім абласным эколага-патрыятычным форуме.

І, нягледзячы на дождж, што пайшоў нечакана, усе вярнуліся дамоў з добрым настроем і прыемнымі ўспамінамі.

Анастасія РОГАВА, удзельнік раённага эколага-патрыятычнага клуба «Спадчына».