Трэба адзначыць, што ў экалагічных конкурсах наша газета ўдзельнічае пастаянна. На абласным узроўні – традыцыйна першае, другое месца і Гран-пры. На рэспубліканскім узроўні гэта ўжо трэцяя перамога. Калі раней па ўмовах конкурсу ўдзельнічалі рэдакцыі, то зараз – асобныя аўтары. Але для нас перамена ўмоў – абставіны не істотныя, бо тэма пераважна знаходзіцца ў руках аднаго журналіста.

Давайце нагадаем крыху гісторыі. На старонках газеты «Крупскі веснік» экалогія – тэма прыярытэтная. Работа ажыццяўляецца ў цесным кантакце з раённай інспекцыяй прыродных рэсурсаў і аховы навакольнага асяроддзя. У далёкім 1988 годзе ўбачыў свет першы выпуск тэматычнай экалагічнай старонкі «Зараніца» і выходзіць з той пары штомесяц. У хуткім часе з’явіўся і дадатак да яе з паэтычнай назвай «Акно ў «Зараніцу».  Увесь гэты час выпуск старонкі і дадатку быў справай клопату сямейнай пары журналістаў Талкачовых. Спачатку сваю душу ўкладваў у гэтую творчую справу Павел Алегавіч, а затым ўжо больш чым дзесяцігоддзе – яго жонка Таццяна Віктараўна.

Нашу «Зараніцу» заўважна адрознівае спалучэнне вострай праблематыкі і пранікнёнай паэтыкі. А інакш і быць не можа. Прыродай нельга не захапляцца, праблемы нельга замоўчваць! Рэпартажы і фотарэпартажы, замалёўкі і актуальны інфармацыйны блок – усё для найбольш поўнага раскрыцця тэмы. Абавязкова ў «Зараніцы» знаходзіцца месца для добрых вершаў, здольных натхніць і закрануць душу чытача. Крытыка ж на безгаспадарчасць выкарыстоўвае ўвесь рэсурс вастрыні журналісцкага пяра.

«Калі кожны з нас будзе лічыць сваім абавязкам зберагчы тое, што дадзена нам прыродай, а таксама прызнае сябе адказным за будучае нашай планеты, мы даб’ёмся поспехаў у захаванні нашага агульнага дома для наступных пакаленняў», – пераканана журналіст.

І вось мы з радасцю ўспрынялі чарговую навіну – Таццяна Талкачова стала адной з трох пераможцаў конкурсу ў намінацыі «Наш агульны дом» у катэгорыі «Прафесіяналы».

Шчыра віншуем!