Падчас наведвання ўчастка мы ўбачылі аформлены «Куток выбаршчыка» з усёй неабходнай інфармацыяй. На стэндзе – склад участковай выбарчай камісіі ўчастка для галасавання № 21, дзе пазначаны прозвішчы старшыні камісіі, яго намесніка і сакратара, нумары іх дамашніх, рабочых і мабільных тэлефонаў. Тут жа можна азнаёміцца з інфармацыяй аб нумарах тэлефонаў Цэнтральнай выбарчай камісіі Рэспублікі Беларусь па выбарах і правядзенні рэспубліканскіх рэферэндумаў, Мінскай абласной выбарчай камісіі, акруговай выбарчай камісіі Крупскай выбарчай акругі № 33, Крупскай раённай выбарчай камісіі. Ёсць таксама нумары тэлефонаў экстраных службаў.

Асобнае месца займаюць Указ Прэзідэнта Рэспублікі Беларусь «Аб прызначэнні выбараў у мясцовыя Саветы дэпутатаў дваццаць восьмага склікання», карты-схемы ўчасткаў для галасавання і выбарчых акруг, рэжым работы камісіі ў перыяд датэрміновага галасавання, а таксама галасавання ў дзень выбараў.

– Выбары любога маштабу – гэта заўсёды момант ісціны, палітычная акцыя, у якой задзейнічаны ўсе без выключэння, – зазначыла старшыня ўчастковай выбарчай камісіі ўчастка для галасавання № 21 Таццяна Казлоўская. – І, бясспрэчна, людзі павінны быць актыўнымі і ініцыятыўнымі, таму што вырашаецца важная дзяржаўная задача. У строгай адпаведнасці з патрабаваннямі Выбарчага кодэксу Рэспублікі Беларусь зараз члены ўчастковай выбарчай камісіі праводзяць работу па ўдакладненні спісаў грамадзян, якія маюць права прымаць удзел у выбарах. Члены выбарчай камісіі вывучылі Выбарчы кодэкс і ведаюць, што ў спіс выбаршчыкаў уключаюцца грамадзяне Рэспублікі Беларусь, якія валодаюць выбарчым правам і дасягнулі да дня або ў дзень выбараў 18 гадоў, зарэгістраваныя да моманту складання спіса па месцы жыхарства або па месцы прабывання на тэрыторыі данага ўчастка для галасавання. Не ўключаюцца ў спіс выбаршчыкаў грамадзяне, прызнаныя судом недзеяздольнымі; асобы, якія ўтрымліваюцца па прыгаворы суда ў месцах пазбаўлення волі; асобы, у адносінах якіх у парадку, устаноўленым крымінальна-працэсуальным заканадаўствам, выбрана мера абмежавання – утрыманне пад вартай. Да сваіх абавязкаў члены выбарчай камісіі адносяцца з усёй адказнасцю.

Цяпер, як вядома, ідзе вельмі важны перыяд: тэрытарыяльнымі, акруговымі выбарчымі камісіямі праводзіцца праверка адпаведнасці парадку вылучэння кандыдатаў у дэпутаты мясцовых Саветаў патрабаванням Выбарчага кодэксу. Як толькі завершыцца рэгістрацыя, а гэта адбудзецца 18 студзеня, кандыдат мае поўнае права займацца перадвыбарнай агітацыйнай работай, якая падоўжыцца да 17 лютага ўключна.