Асноўная мэта – удзел дзяцей ў актыўнай сацыяльна значнай дзейнасці. Вядома ж, яны пакуль што не маюць права голасу, але вельмі добра, што з дзяцінства вучацца адчуваць сваю прыналежнасць да лёсу краіны, разбірацца ў палітычных і грамадскіх працэсах і рыхтавацца да ўдзелу ў іх.Што рабілі школьнікі падчас конкурсу? Сваёй творчасцю яны паказвалі любоў да Радзімы, павагу да людзей, што жывуць на Беларусі. На сцэне былі сапраўдныя маленькія патрыёты. Пра гэта сведчыла ўсё – і касцюмы ў нацыянальных колерах з нацыянальнай сімволікай, і рэпертуар. У раённым этапе IV рэспубліканскага конкурсу каманд падтрымкі «Піянерскія іскры» прынялі ўдзел сем каманд з розных устаноў адукацыі, кожная з 12 удзельнікаў. Кожны нумар меў сваю арыгінальную рэжысуру. Пастаноўкі складаліся з патрыятычных песень, танцавальных і гімнастычных элементаў, гучалі дэвізы, заклікі. Усё на беларускай мове і аб’яднанае адной галоўнай думкай: «Мы любім Беларусь!»
Па выніках раённага этапу IV рэспубліканскага конкурсу каманд падтрымкі «Піянерскія іскры» былі вызначаныя пераможцы. Так, ва ўзроставай катэгорыі «Зорачкі» (7-10 гадоў) першае месца ў каманды «Спадчына» СШ № 3 г.Крупкі, другое – у каманды «Нашчадкі» Крупскай раённай гімназіі. А ў катэгорыі «Іскрынкі» (11-14 гадоў) першае месца ў каманды «Зарнічкі» Бобрскай СШ, другое – у каманды «Праменьчыкі Радзімы» Хацюхоўскай СШ.
