З аўторка ідзе датэрміновае галасаванне, падчас якога карэспандэнты газеты "Крупскі веснік" наведваюць асобныя выбарчыя ўчасткі і цікавіліся ходам галасавання, настроем выбаршчыкаў.Участак для галасавання № 11, які размяшчаецца ў будынку Прошыцкага сельскага клуба-бібліятэкі, уразіў нас змястоўным афармленнем інфармацыйных і даведачных матэрыялаў, сардэчнасцю членаў выбарчай камісіі. Па ўсім бачна, што ў плане арганізацыі тут усё падрыхтавана, як трэба.
– Безумоўна, большасць нашых выбаршчыкаў прыйдзе на выбарчы ўчастак, каб аддаць свае галасы за кандыдатаў у дэпутаты, непасрэдна ў нядзелю, 18 лютага, – расказвае старшыня выбарчай камісіі Людміла Паддубская. – Амаль 600 выбаршчыкаў, якія знаходзяцца ў спісах, пражываюць у блізляжачых населеных пунктах Акцябрскага сельсавета. Бясспрэчна, што многія з іх пажылыя, таму падалі заявы, каб да іх у дзень выбараў прыехалі на дом. На нашым выбарчым участку адзін малады чалавек – Антон Крышкавец – будзе галасаваць упершыню. Для яго падрыхтаваны памятны сувенір. У спісах выбаршчыкаў ёсць таксама два чалавекі, у якіх дзень нараджэння прыпадае якраз на 18 лютага. Гэта – жыхар вёскі Дубраўка Валерый Касцючэнка і аграгарадка Калодніца Дзмітрый Прышчэпаў. Іх таксама ўчастковая выбарчая камісія не пакіне без увагі.
Пакуль мы гутарылі з Людмілай Аўтонаўнай, на ўчастак заходзілі вяскоўцы, атрымлівалі бюлетэні, распісваліся ў атрыманні іх, заходзілі ў кабіну. Зрабіўшы свой выбар, яны апускалі бюлетэні ў спецыяльную скрынку для датэрміновага галасавання. Пры размове многія з іх расказалі, што прэтэндэнтаў на дэпутацкія мандаты бачылі ў час сустрэч, па радыё чулі перадвыбарныя праграмы асобных, таму выбар рабілі ўсвядомлена.
У прыватнасці, жыхар вёскі Прошыка Леанід Вашкевіч зазначыў, што датэрміновае галасаванне вельмі зручна для тых, хто па той або іншай прычыне не зможа прыйсці рэалізаваць сваё канстытуцыйнае права ў асноўны дзень. «Што датычыць выбараў, то гэта, несумненна, вельмі важны момант, – працягваў Леанід Сцяпанавіч. – Дэпутат, як вядома, навідавоку ў сваіх выбаршчыкаў і ў курсе ўсіх іх праблем. І не толькі. Асабіста я галасаваў за тых народных абраннікаў, якія ўмеюць выстройваць дыялог з любым наведвальнікам, кампетэнтныя ў пытаннях заканадаўства, не забываюць, што ў іх ёсць такая форма стасункаў з выканаўчай уладай, як дэпутацкі запыт».
Да нашай размовы далучыўся і Юрый Бародкін, які таксама толькі што прагаласаваў. «Сапраўды, дэпутаты павінны своечасова рэагаваць на просьбы тых, хто да іх звярнуўся, умець аператыўна шукаць шляхі іх вырашэння. Зразумела, што ад актыўнай пазіцыі народнага абранніка ў многім залежыць наш дабрабыт. Галоўнае ж – усе словы і абяцанні дэпутата павінны пацвярджацца справай», – дадаў Юрый Іванавіч.
Выбарчая кампанія, як бачым, праходзіць на дастаткова высокім узроўні. А наколькі законны працэс волевыяўлення на гэтым участку для галасавання, сведчыць той факт, што назіральнікамі за гэтыя дні не зафіксавана ніводнага выпадку парушэння.
