Падчас правядзення Дзён падпісчыкаў заўсёды даводзіцца пераконвацца, што значная колькасць жыхароў у аддзяленні сувязі і горада, і сельскія прыходзяць менавіта ў вызначаныя дні. Так надарылася і на гэты раз. Многія гараджане, ужо выпісаўшы тое або іншае перыядычнае выданне, чакалі адкрыцця абласнога Дня падпісчыка. Тым больш, што сёлета на прэзентацыю сваіх выданняў да крупчан, акрамя нас, прыехалі і прадстаўнікі абласной газеты «Мінская праўда». 

Тут жа, у аддзяленні, была арганізавана міні-выстава найбольш папулярных газет і часопісаў, іншай рэкламнай прадукцыі, прызоў і сувеніраў. Актыўным падпісчыкам уручаліся каляндарыкі, сувенірныя ручкі, блакноты з лагатыпамі газет «Крупскі веснік» і «Мінская праўда», маляўнічыя часопісы. 

Начальнік Крупскага цэха сувязі Барысаўскага раённага вузла паштовай сувязі РУП «Белпошта» Людміла Пацэева, якая прымала самы непасрэдны ўдзел у мерапрыемстве, напомніла, што падпіска на асноўныя выданні закончыцца 27 сакавіка, а на раённую газету «Крупскі веснік» – 29 сакавіка, выказала шкадаванні, што многія адкладваюць гэту справу на апошнія дні.

– Даводзіцца канстатаваць, што да заканчэння падпісной кампаніі на ІІ квартал бягучага года часу засталося зусім мала, – гаварыла Людміла Васільеўна. – У каталогах друкаваных сродкаў масавай інфармацыі, якія, дарэчы, ёсць літаральна ва ўсіх аддзяленнях паштовай сувязі, у тым ліку і ў перасоўных, а таксама ў грамадскіх распаўсюджвальнікаў, шмат самай рознай перыёдыкі. Хачу звярнуцца да крупчан з просьбай як мага хутчэй  наведаць паштовыя аддзяленні па месцы жыхарства, звяртацца да паштальёнаў, званіць да нас па тэлефоне 5-69-24 і выпісаць газету ці часопіс на свой густ. 

Паспяшайцеся, і ўжо ў першы дзень красавіка вы ўбачыце ў сваёй паштовай скрынцы любімае выданне. Мы заўсёды рады сустрэчы з вамі, нашы шаноўныя чытачы.

Фота Аляксандра БУДЗЬКО.