Наводзіць парадак у лясных масівах, вакол вёсак, аграгарадкоў 20 кастрычніка выйшлі амаль 350 чалавек, з іх 280 работнікаў лясгаса і звыш 60 добраахвотнікаў. У Год малой радзімы асноўная ўвага была ўдзелена мемарыяльным комплексам і помнікам. Падчас акцыі былі задзейнічаны 22 аб’екты, на якіх праводзіліся работы. Убралі амаль 6 кубічных метраў смецця вакол аўтадарог і населеных пунктаў, на месцах адпачынку, таксама правялі ачыстку лесу ад захламленасці і ўбралі 59 кубічных метраў галля, амаль на 22-гектарнай плошчы пасадзілі 17 200 дрэў.– Садзейнічанне падтрыманню ў належным стане земляў ляснога фонду з’яўляецца абавязкам кожнага грамадзяніна, – адзначыла намеснік дырэктара Крупскага лясгаса па ідэалагічнай рабоце Наталля Камовіч. – Разам з тым, па-ранейшаму актуальнай застаецца праблема несанкцыянаваных звалак будаўнічых і бытавых адходаў, іншых пабочных прадметаў у лясах, якія прымыкаюць да аўтамабільных і чыгуначных дарог, вакол населеных пунктаў, на пляцоўках адпачынку і аўтастаянках. Менавіта для прыцягнення мясцовага насельніцтва, моладзі, грамадскасці да дзейнасці лясной гаспадаркі і праводзілася добраахвотная акцыя «Чысты лес». Загадзя ў нас была створана рабочая група, распрацаваны і зацверджаны план мерапрыемстваў, вызначаны аб’екты. У прыватнасці, работнікамі Бобрскага доследна-вытворчага лясніцтва наведзены парадак ля помніка Герою Савецкага Саюза Васілю Чабатарову, ачышчаны ад захламленасці кварталы 54, 62, 63, 55, 65, на двухгектарнай плошчы пасаджаны саджанцы.
Далей Наталля Камовіч назвала аб’екты, на якіх працавалі ў мінулую суботу работнікі ўсіх лясніцтваў. У многіх кварталах лясніцтваў лес ачышчаўся ад захламленасці, убіраліся месцы адпачынку і прыбярэжныя палосы возера Сялява, спальваліся парубачныя рэшткі, вялася пасадка лясных культур.
