У ЛЮТЫМ, напрыклад, споўніцца 80 гадоў з таго часу, як Крупскі раён увайшоў у склад Мінскай вобласці, а ў жніўні – такая ж дата, як мястэчкі Крупкі і Халопенічы перайменаваны ў гарадскія пасёлкі. У 1613 годзе, а гэта 405 гадоў таму, упершыню на карце Вялікага Княства Літоўскага з’явілася паселішча Крупкі. А вось яшчэ адна адметная дата – у наступным годзе споўніцца 245 гадоў (1773 г.), як у мястэчку Халопенічы адкрылася адна з першых свецкіх школ на Беларусі. 25 гадоў назад быў створаны ландшафтны заказнік рэспубліканскага значэння «Сялява».

КАЛІ гаварыць аб юбілейных датах прадпрыемстваў, арганізацый і ўстаноў, то тут варта нагадаць, што 65-годдзе з дня свайго ўтварэння адзначыць пракуратура Крупскага раёна, 55-годдзе – філіял КУП «Мінскаблдарбуд»-«ДРБУ № 164» і Крупскі раён электрасетак філіяла Барысаўскіх электрасетак Мінскага РУП электраэнергетыкі «Мінскэнерга». Пяцідзясятую гадавіну з дня свайго ўтварэння (17.07.1963 г.) будзе адзначаць Халопеніцкі вытворчы ўчастак ААТ «Здравушка-мілк», 40-годдзе з дня ўтварэння (красавік 1978 г.) – ТАА «Крупскае аграпрамэнерга», а таксама філіял Крупскага УМГ ТАА «Газпрам трансгаз Беларусь» (12.12.1978 г.) і раённая інспекцыя па насенняводству, каранціну і ахове раслін (27.12.1978 г.).

АДМЕТНЫЯ даты ў наступным годзе адзначаць і асобныя ўстановы адукацыі. У прыватнасці, 155 гадоў з дня заснавання (верасень 1863 г.) споўніцца Халопеніцкай сярэдняй школе імя М. Багдановіча, такую ж дату, толькі ў кастрычніку, адзначыць Ігрушкаўская сярэдняя школа. Своеасаблівы юбілей – 140-годдзе з дня заснавання – 1 лістапада будзе адзначаць Ухвальская сярэдняя школа, а 110-годдзе –  Хацюхоўская сярэдняя школа імя У.В. Кавалёнка.

ПАМЯТНЫЯ даты адзначаць у наступным годзе і рэлігійныя ўстановы. Так, кляштару дамініканцаў у Халопенічах (цяпер памяшканне ГпДК) споўніцца 315 гадоў (1703 г.). 190 гадоў (1828 г.) споўніцца і з дня ўзвядзення Свята-Успенскай царквы ў Халопенічах.

АСОБНЫ раздзел – знакамітыя землякі. Сярод іх – Васіль Сямёнавіч Пыжыкаў – адзін з кіраўнікоў партызанскага руху ў Мінскай вобласці ў гады Вялікай Айчыннай вайны, якому 15 снежня споўнілася б 125 гадоў. 17 мая – 110 гадоў з дня нараджэння Героя Савецкага Саюза Марціна Акімавіча Сурына, які жыў і працаваў у вёсцы Нача, 15 сакавіка – 100 гадоў з дня нараджэння Героя Савецкага Саюза Якава Дзмітрыевіча Бяляева, які загінуў у баях каля вёскі Сомры. 25 чэрвеня – 100 гадоў з дня нараджэння Героя Савецкага Саюза Васіля Міхайлавіча Чабатарова, які загінуў пры вызваленні г.п. Бобр. 14 кастрычніка (14.10.1923–27.11.2004)  спаўняецца 95 гадоў з дня нараджэння Івана Астапавіча Мазгавога, Героя Савецкага Саюза, якому прысвоена гэта званне за бой ля вёскі Абчуга (27.06.1944 г.). 

У НАСТУПНЫМ годзе свае юбілейныя даты адзначаць таксама многія іншыя нашы землякі: 95-годдзе з дня нараджэння (10.03.1923-18.02.2012) – ваенны дзеяч, Герой Савецкага Саюза, вучоны-філосаф Мікалай Якаўлевіч Зайцаў; 2 студзеня сваё 85-годдзе адзначыць акадэмік НАН Беларусі, доктар фізіка-матэматычных навук Андрэй Маркавіч Ганчарэнка, які нарадзіўся ў вёсцы Версанка; 80-годдзе з дня нараджэння (1938-1998) – дацэнт кафедры гідратэхнічнага інстытута, аўтар 50 навуковых прац, ураджэнец вёскі Заполле Мікалай Васільевіч Сініцын, вучоны-гісторык, ураджэнец вёскі Буда Фёдар Іванавіч Мельнік (1938-1986) і паэт, перакладчык, член Саюза пісьменнікаў Беларусі, ураджэнец вёскі Шынкі Пётр Рыгоравіч Макарэвіч (1938-2014).

8 красавіка сваё 70-годдзе з дня нараджэння адзначыць гісторык, юрыст, пісьменнік, доктар гістарычных навук, прафесар, ураджэнец г.п. Халопенічы Анатоль Васільевіч Шаркоў, а 25 лютага – 60 гадоў споўніцца вучонаму, фалькларысту, кандыдату філалагічных навук, старшаму навуковаму супрацоўніку інстытута мастацтвазнаўства, этнаграфіі і культуры, аўтару звыш 80 навуковых публікацый, ураджэнцу вёскі Селішча Аляксандру Віктаравічу Цітаўцу.

Будуць адзначаць адметныя даты ў сваім жыцці і многія іншыя нашы знакамітыя землякі. Сачыце за публікацыямі ў газеце.