Прысутныя шчыра віталі гасцей свята – старшыню Крупскага райвыканкама Анатоля Козела, генеральнага дырэктара ААТ “Агракамбінат “Дзяржынскі”, члена Савета Рэспублікі Нацыянальнага сходу Рэспублікі Беларусь Уладзіміра Лук’янава, кіраўнікоў і спецыялістаў гаспадарак і прадпрыемстваў раёна.
Са словамі прывітання да ўдзельнікаў свята звярнуўся старшыня райвыканкама Анатоль Козел:
– Сёння на Крупшчыне свята першага снапа. Хлебаробы пачынаюць уборку новага ўраджаю, які з’яўляецца вынікам шматдзённай працы вяскоўцаў. Таму сённяшняе свята – гэта курс на багаты ўраджай і на тое, што “Дажынкі” ў нас будуць добрыя і нам будзе чым ганарыцца.
Кіраўнік раёна адзначыў, што камбайнеры павінны прыкласці максімум намаганняў, каб у аптымальныя тэрміны ўбраць хлеб на плошчы каля 20 тысяч гектараў, выканаць дзяржзаказ, сфарміраваць насенны фонд, стварыць кармавую базу. А для гэтага ў стане баявой гатоўнасці знаходзяцца 63 камбайны.
Анатоль Козел пажадаў усім моцнага здароўя, высокіх намалотаў, новых працоўных перамог, аптымізму, дабрабыту ў сем’ях, міру, дабра і добрага надвор’я.
– Пройдзе некалькі тыдняў, і ў кожным доме на сталах нашых землякоў будзе хлеб з новага ўраджаю, -- сказаў напрыканцы старшыня райвыканкама. – А пакуль усё толькі пачынаецца. У добры шлях!
Як сімвал дастатку і дабрабыту, Анатолю Козелу ўручаецца каравай з ураджаю мінулага года.
Удзельнікаў свята раённых “Зажынак” павіншаваў генеральны дырэктар ААТ “Агракамбінат “Дзяржынскі” Уладзімір Лук’янаў. Адзначым, што на Крупшчыне працуе і развіваецца вытворчая пляцоўка “Дворышча” агракамбіната “Дзяржынскі”. Сёлета працаўнікі пляцоўкі ўпершыню удзельнічаюць у “Зажынках”, бо пачалі актыўна развіваць земляробства. Уладзімір Лук’янаў запэўніў, што з кожным годам іх унёсак у каравай Крупшчыны будзе ўсё больш важкім. Ад шчодрай Крупскай зямлі госцю таксама быў уручаны каравай. Памятны падарунак ААТ “Крупскі райаграсэрвіс” – гаспадарцы, якая гасцінна прымае раённыя “Зажынкі” і дае пачатак жніву-2020 – уручаны ад райкама прафсаюзаў работнікаў АПК. Пераможцам конкурсу на лепшы зажыначны сноп у гэтым годзе стаў калектыў ААТ “Старасельскае” і атрымаў прыз ад райкама прафсаюза работнікаў АПК.
З малітвай і благаславеннем да хлебаробаў звярнуўся пратаіерэй Мікалай Гмір, які асвяціў хлебную ніву, тэхніку і тых, хто будзе працаваць на ёй у саму гарачую пару сельскагаспадарчага года.
Жнейкі зажынаюць першы сноп, які ўручаецца старшыні райвыканкама, камбайнеры атрымліваюць падарункі і накіроўваюцца да сваіх камбайнаў.
Сімвалічна, што першы камбайн вывеў у поле старшыня райвыканкама Анатоль Козел. Разам з ім у кабіне – адзін з лепшых працаўнікоў раёна – механізатар ААТ “Старасельскае” Валерый Антаневіч. Пачатак вялікаму хлебу пакладены.
