Барыс Аракчэеў – мастак, які на працягу свайго доўгага творчага шляху падкрэсліваў сваю прыхільнасць рэалізму.

Шмат гадоў жывапісец прысвяціў справе падрыхтоўкі і выхавання маладога пакалення. Ён выкладаў малюнак, жывапіс і кампазіцыю ў Мінскім мастацкім вучылішчы (1966-1971), а затым дваццаць пяць гадоў у Беларускай акадэміі мастацтваў. Атрымаў званне дацэнта. Падрыхтаваў дзесяткі дыпломнікаў, сярод якіх вядомыя мастакі: У.Кожух, А.Кузьміч, Ф.Янушкевіч, У.Ясюк.

Майстар Барыс Уладзіміравіч Аракчэеў шчодра дзяліўся сваёй творчай спадчынай. Мастацкай галерэі горада Крупкі падчас яе адкрыцця ў 2005 годзе ён падараваў палатно “Генерал Кульнёў і гродзенскія гусары ў бітве пад Клясціцамі. 1812 год” (1992). У 2009 годзе перадаў у дар Крупкам свае вядомыя палотны: “Брэсцкая крэпасць. 1941 год” (198-1983), “На заданне. Апошні наказ” (1984), “Сенажаць” (1976), “Венера і бэз” (1995) і інш. Гэта карціны, якімі магла бы ганарыцца любая галерэя.

Творчасць вядомага мастака, педагога Барыса Аракчэева ўнесла фундаментальны ўклад у развіццё сучаснага выяўленчага мастацтва Беларусі.

У 2011 годзе Барыс Уладзіміравіч Аракчэеў за заслугі ў развіцці адукацыі і культуры быў ушанаваны Ордэнам Францыска Скарыны.

Мастацкай галерэі горада Крупкі з красавіка 2015 года прысвоена імя Барыса Уладзіміравіча Аракчэева.