У раёне праходзіць месячнік «Человек с белой тростью», які закліканы прыцягнуць увагу шырокай грамадскасці да неабходнасці вырашэння сацыяльных праблем інвалідаў па зроку, абароны іх правоў і інтарэсаў, павышэння якасці жыцця невідушчых і слабавідушчых людзей. На перыяд месячніка раённай арганізацыяй грамадскага аб’яднання «Беларускае таварыства інвалідаў па зроку» запланавана правядзенне самых розных мерапрыемстваў. Адно з іх – «круглы стол», прысвечаны актуальным пытанням стварэння аб’ектаў безбар’ернага асяроддзя, прайшло ў чытальнай зале раённай бібліятэкі імя Янкі Купалы.Напачатку ўсе прысутныя азнаёміліся з кніжнай выставай «Я бачу свет сэрцам», на якой былі прадстаўлены экзэмпляры газеты «Вместе», кнігі «Партызанская мадона» Леаніда Левановіча, «Анёлак мой, анёлак...» Уладзіміра Гаўрыловіча, аўдыёкнігі з творамі беларускіх аўтараў – Уладзіміра Караткевіча, Янкі Маўра, Івана Шамякіна, Янкі Брыля. На асобнай паліцы былі змешчаны аўдыёкнігі Міхаіла Булгакава, Даніэлы Стыл, Анатоля Прыстаўкіна, Ганны Берсеневай, Алега Роя і іншых. Пра выставу падрабязна расказала загадчык аддзела абслугоўвання і інфармацыі раённай бібліятэкі Людміла Прыстаўка.
Падчас «круглага стала» старшыня раённай арганізацыі грамадскага аб’яднання «БелТІЗ» Ала Мазнёва гаварыла аб тым, што ў стварэнні безбар’ернага асяроддзя іх арганізацыя, а таксама Крупскі тэрытарыяльны цэнтр сацыяльнага абслугоўвання насельніцтва працуюць ужо шмат гадоў. Зроблена многае: у сацыяльна значных месцах жоўтай фарбай падфарбаваны ступенькі лесвічных маршаў, ёсць пандусы, пакладзены шыпаваныя дываны і, згодна новых патрабаванняў, укладваецца тактыльная плітка.
Выкананне мерапрыемстваў па арганізацыі безбар’ернага асяроддзя жыццядзейнасці інвалідаў і фізічна аслабленых асоб на бягучы год прааналізавала загадчык аддзялення дзённага прабывання для інвалідаў ТЦСАН Людміла Гур. Яна адзначыла, што Крупскай ЦРБ на афарбоўванне проступу першай і апошняй ступеняў лесвічнага марша ў будынку Крупскай ЦРБ выдзелена 70 тыс. рублёў, а на афарбоўванне аналагічных ступеняў лесвічнага марша ў будынку Халопеніцкай гарпасялковай бальніцы – 20 тыс. рублёў.
– Зроблена абуладкаванне пандуса пры ўваходзе ў магазін «Надзея» аграгарадка Нача і ў магазін «Родник» № 4 г. Крупкі па вул. Майскай, 1, – адзначыла Людміла Пятроўна. – Абуладкавана тратуарнае пакрыццё пры ўваходзе ў майстэрню па рамонту абутку ў г. Крупкі па вуліцы Савецкай, 3. Абуладкаваны мабільны (адкідны) пандус у другім пад’ездзе пры пад’ёме на 1-ы паверх (жылы дом сацыяльна-камерцыйнага прызначэння па вул. Міру). Зроблена абуладкаванне пандуса і двух поручняў у магазіне «Родны кут» г. Крупкі па вул. Леніна, 14. Наогул, усе работы на іншых аб’ектах будуць выкананы да канца 2018 года.
Асобныя пытанні абмяркоўвалі і прысутныя на «круглым стале». У прыватнасці, была ўнесена прапанова арганізаваць суботнік, каб пафарбаваць у жоўты колер пераход, што ля раённай гімназіі. Унесена таксама прапанова па змяншэнні бардзюраў па вуліцы Інтэрнацыянальнай. Наогул, было вырашана хадайнічаць перад вышэйстаячымі арганізацыямі па зніжэнні бардзюрнага камня на многіх вуліцах горада.
Актыўны ўдзел у правядзенні «круглага стала» прынялі прадстаўнікі цэнтральнай раённай бальніцы і раённага Цэнтра гігіены і эпідэміялогіі. На пытанні прысутных адказы давала намеснік дырэктара Крупскага тэрытарыяльнага цэнтра сацыяльнага абслугоўвання насельніцтва Аксана Клімянкова.
