Галоўная мэта свята – захаванне моўнай і культурнай разнастайнасці ў свеце, падтрыманне нацыянальных моў і культур, а таксама забеспячэнне права кожнага грамадзіна карыстацца роднай мовай. У гэты дзень у школах праводзяцца Дні і Тыдні мовы, ладзяцца спецыяльныя дыктанты, канцэрты, іншыя пазнавальныя і навучальныя мерапрыемствы.

Вось і ў нашым садку ў Міжнародны дзень роднай мовы пройдзе літаратурна-музычнае падарожжа «Беларусь – наша Радзіма», падчас якога мы будзем далучаць дзяцей да нацыянальных традыцый і творчасці беларускіх паэтаў. Удзел у мерапрыемстве, якое рыхтуюць музычны кіраўнік Ірына Шапавал, кіраўнік па фізічнаму выхаванню Нона Бугаец разам з выхавацелем, аўтарам гэтых радкоў, прымуць выхаванцы старшай групы № 2 і іх бацькі.  

У падарожжа яны адправяцца на цягнічку, дзе на прыпынку «Вершавальны» будуць дэкламаваць вершы, на прыпынку «Ветлівыя словы» будуць вітаць гасцей свята ветлівымі словамі, на прыпынку «Павучальны» ўзгадаюць пра Францішка Скарыну, раскажуць прыказкі і прымаўкі пра навуку і веды. Будуць выконваць таксама беларускія песні «Госцейкі» і «Цік-так ходзікі», прымаць удзел у нацыянальных гульнях «Яшчур» і «Гарлачык», разам з бацькамі адгадваць загадкі-жарты і быць перакладчыкамі з рускай мовы на беларускую, пастараюцца запомніць 10 запаведзяў аб мове Віктара Шведа «Мову родную беражы».

І напрыканцы мерапрыемства нашы выхаванцы запросяць усіх размаўляць у гэты дзень на такой мілагучнай і пяшчотнай беларускай мове. Тым самым маленькія грамадзяне далучацца да роднай мовы, да культурнай спадчыны свайго народа, бо гэта нашы карані, нашы вытокі. 

Каб свята атрымалася прыгожым, бацькі выступілі спонсарамі ў набыцці тканіны і тасьмы для беларускіх строяў, а наш супрацоўнік, чараўніца Ніна Ярмоленка, пашыла ўсю гэту прыгажосць. Вялікі ёй дзякуй!

Вольга ЗМІТРАКОВІЧ, выхавацель дзіцячага садка «Алёнка».