Тэма дня ў гэтым годзе – «Наша біяразнастайнасць, наша харчаванне, наша здароўе». Біялагічная разнастайнасць – ці разнастайнасць асобных відаў ці цэлых экасістэм – жыццёва важная для здароўя і дабрабыту чалавека. Сёння, у Міжнародны дзень біялагічнай разнастайнасці, таварыства настойліва заклікае ўсіх – урады, дзелавыя колы і грамадства – прыняць тэрміновыя меры для таго, каб абараніць і беражліва выкарыстаць гэту абсалютна неабходную сістэму жыццядзейнасці на нашай планеце.У чым каштоўнасць біялагічнай разнастайнасці? Нягледзячы на растучае прызнанне таго, што біялагічная разнастайнасць з’яўляецца агульным здабыткам, які ўяўляе вялізную каштоўнасць для сённяшняга і будучых пакаленняў, колькасць відаў дзікай флоры і фаўны працягвае скарачацца хуткімі тэмпамі ў выніку чалавечай дзейнасці. Канвенцыя аб біялагічнай разнастайнасці ўяўляе сабой міжнародны прававы дакумент, тры асноўныя мэты якога заключаюцца ў захаванні біяразнастайнасці, устойлівым выкарыстанні біяразнастайнасці і сумесным атрыманні на справядлівай і роўнай аснове выгод, звязаных з выкарыстаннем генетычных рэсурсаў. На сённяшні дзень Канвенцыя ратыфікавана 196 краінамі.
Тэма Міжнароднага дня біялагічнай разнастайнасці невыпадковая. Цяпер у чалавецтва з’явіўся доступ да большай разнастайнасці ежы. Але нават калі прапаноўваемыя прадукты харчавання становяцца ўсё больш разнастайнымі, глабальны рацыён у цэлым – менавіта тое, што на самой справе ядуць людзі, -- становіцца ўсё больш аднародным. Таму сёлетняе святкаванне сканцэнтравана на біяразнастайнасці ў якасці асновы нашага харчавання і здароўя і ключавога каталізатара трансфармацыі харчовых сістэм і паляпшэння здароўя людзей.
Тэма накіравана на выкарыстанне і распаўсюджанне ведаў аб залежнасці нашых харчовых сістэм, харчавання і здароўя ад біяразнастайнасці і ўстойлівых экасістэм. Гэта тэма таксама звяртае ўвагу на ролю разнастайнасці нашых прыродных сістэм у чалавечым існаванні і дабрабыце на Зямлі, а таксама садзейнічае дасягненню іншых мэт у галіне ўстойліваага развіцця, уключаючы, сярод іншага, змякчэнне наступстваў змянення клімату і адаптацыю да іх, аднаўленне экасістэм, забеспячэнне доступу да чыстай вады.
Задачы спынення працэсу страты біяразнастайнасці і садзейнічання рацыянальнаму выкарыстанню экасістэм уключаны ў Мэту 15. Каля мільёна відаў флоры і фаўны знаходзяцца на мяжы поўнага знікнення. Многія жывёлы і расліны могуць бясследна знікнуць ужо ў бліжэйшыя дзесяцігоддзі. Эколагі і эксперты заклікаюць мабілізаваць усе намаганні для захавання біяразнастайнасці: ад каралавых рыфаў – да рэдкіх відаў тыграў і птушак.
