Нарадзіўся наш зямляк у вёсцы Купленка Ухвальскага сельсавета ў сялянскай сям'і 15 ліпеня 1939 года. Пасля заканчэння ў 1956 годзе Ухвальскай школы працаваў сезонным рабочым на лесараспрацоўках на Поўначы. Вярнуўся на Радзіму праз год, уладкаваўся ў саўгас «Ухвала». Але творчасць натуры і цяга да літаратуры абудзілі да паступлення на аддзяленне журналістыкі філфака БДУ. Пасля яго заканчэння чатыры гады працаваў у маладзёжнай газеце «Чырвоная змена». З 1979 па 2003 гады ён з’яўляўся спецкарэспандэнтам Беларускага радыё. Свой першы верш надрукаваў у 1956 годзе ў газеце «Піянер Беларусі». Затым выйшлі кнігі паэзіі «Вогненная камета», «Мерыдыяны і паралелі», «Ліставей». У 1974 годзе ўбачыла свет кніга вершаў «Вечнае дрэва». Галоўны змест яе – чалавек і яго адносіны да прыроды.
Уражанні юнацкай пары, звязаныя з працай хлебароба, як і ўсе наступныя сустрэчы з землякамі, ляглі ў аснову кнігі нарысаў «Палын і медуніца». Усе 10 нарысаў прысвечаны землякам-калгаснікам вёскі Купленка. Пісьменніку ўдалося стварыць яркія малюнкі працы і быту вяскоўцаў, раскрыць іх багаты духоўны свет, апець прыгажосць беларускай вёскі.
У 1980 годзе выйшла другая кніга нарысаў «Зямное сузор’е». У яе аўтар уключыў дакументальныя нарысы пра Герояў Сацыялістычнай Працы, якія жывуць і працуюць у розных раёнах і гарадах Беларусі. Кніга пабудавана ў форме дарожнага дзённіка: аўтар едзе па рэспубліцы, сустракае цікавых людзей і расказвае пра іх. Затым выйшлі кнігі «Відушчы посах», «Сумежжа», «Праталіна».
У 1993 годзе выдавецтва «Мастацкая літаратура» выпусціла ў свет кнігу «Везувій». Новы паэтычны твор вызначаецца смеласцю думкі, глыбінёй і вастрынёй узнятых праблем, тэматычнай навізной і разнастайнасцю мастацкіх сродкаў, імкненнем сказаць праўдзівае слова пра тыя змены, што адбыліся ў духоўным жыцці нашага грамадства за апошнія гады. Тэматычна блізка да гэтых твораў прымыкаюць вершы-споведзі, вершы-лёсы, вершы-партрэты, што па сваіх памерах набліжаюцца да невялікіх паэм.
У 2012 годзе выйшла ў свет кніга вершаў «Неба ў руках», дзе сабраны ўсе лепшыя творы, напісаныя за гады яго творчасці. Ёсць у кнізе верш «Партрэт хлеба» – своеасаблівы гімн сучаснаму зямному цуду, на якім трымаецца ўсё наша жыццё. Значнае месца тут займаюць і паэмы. Некаторыя з іх, як, напрыклад, «Ліст з Юрмалы», маюць форму разгорнутага паэтычнага партрэта.
